A Cidade da Cultura celebra a súa contribución ao emprendemento e ás tecnoloxías no seu décimo aniversario
mércores, 13 de xaneiro do 2021
A
Cidade
da Cultura de Galicia celebrou este mércores 13 de xaneiro a súa
primeira década de vida, e fíxoo cun acto institucional no que
se fixo balance do acadado até o de agora e, tamén, un repaso das
cousas que nos depara o complexo do monte Gaiás no futuro, moitas
delas tecnolóxicas e moitas delas directamente encamiñadas a
reivindicar a colaboración, a unidade e a cultura como antídotos de
adversidades coma a que estamos a vivir. Segundo se fixo saber, o
complexo cultural xa acolleu nestes dez anos preto de 5.000
actividades culturais e eventos e recibiu case 6 millóns de visitas.
Amais, deu acubillo a case medio milleiro de proxectos de
emprendemento.
O
conselleiro de Cultura, Román Rodríguez González, asegurou que
remata unha “fase de consolidación desta potente infraestrutura
como ferramenta para o desenvolvemento social, cultural e económico
da Comunidade e que arrinca unha nova etapa baseada na expansión
para chegar máis lonxe”. Tamén destacou o importante papel xogado
polo complexo do Gaiás como “espazo de referencia no eido da
cultura, a tecnoloxía e o emprendemento”, con máis de 600 persoas
traballando a diario nas súas instalacións, unha media anual de
case 200 actividades culturais e 400 eventos organizados por
empresas, institucións e colectivos sociais nas súas instalacións,
e que pechou 2019 recibindo a máis dun millón de persoas, entre
visitantes, turistas, usuarios dos servizos públicos e
traballadores.
No
acto tamén participou o alcalde de Santiago, Xosé Antonio Sánchez
Bugallo, quen lle agoiro á Cidade da Cultura un futuro
prometedor: “Dentro de 40 anos, cando se cumpra medio século do
seu funcionamento, será unha infraestrutura, un equipamento asumido
por todos os galegos como un emblema e un elemento significativo e
representativo do conxunto de Galicia, e estará integrada dentro da
malla urbana da cidade”.
Para
o rexedor compostelán, “o Gaiás se está consolidar como un
referente absolutamente positivo, un investimento e non un gasto”.
Sinalou que hai moi pouco marxe de tempo para facer, neste momento,
unha valoración da Cidade da Cultura, xa que sinalaba, citando ao
arquitecto, Julio Cano Laso, “que as grandes obras hai que
valoralas cunha perspectiva de 50 anos”.
Volvendo
ao conselleiro, tamén fixo referencia do importante papel xogado
polo Museo Centro Gaiás, que con 21 grandes exposicións, que “se
ten convertido nun centro de referencia no norte de España,
recibindo máis de 600.000 visitas ao longo da década, ademais de
consolidarse como unha potente ferramenta didáctica que achega os
seus contidos a unha media de 15.000 estudantes de diferentes centros
da comunidade autónoma con programas innovadores e pioneiros”.
En
relación coa Biblioteca e co Arquivo de Galicia, as primeiras
institucións en comezar a funcionar en 2011, o titular de Cultura
destacou que “hoxe ocupan un lugar central como gardiáns da
memoria documental e bibliográfica” de Galicia e como
“coordinadores das redes públicas de bibliotecas e arquivos de
toda a Comunidade”.
Xunto
á cultura e á tecnoloxía, o conselleiro lembrou o traballo a prol
do emprendemento cultural, cun total de 450 proxectos innovadores no
eido das industrias creativas apoiado desde a apertura do Centro de
Emprendemento do Gaiás, proxectos que, en moitos dos casos, son hoxe
empresas consolidadas xeradoras de postos de traballo.
Na
nova etapa, o conselleiro adiantou que o Gaiás afondará na súa
dimensión de “factoría de proxectos culturais”, pero “sempre
co obxectivo de que estes contidos percorran outros espazos culturais
de Galicia, nun circuíto de itinerancias que pretender converter
esta infraestrutura nun fornecedor de contidos para toda a
Comunidade”.