A Cidade das TIC da Coruña acollerá un centro de servizos avanzados
xoves, 25 de xuño do 2020
O
Goberno galego deu este xoves un novo empuxe á Cidade das TIC da
Coruña, que acubillará un centro de fabricación avanzada, xunto
coa Plataforma Loxística Industrial de Salvaterra – As Neves, o
Parque da Sionlla (Santiago) e os concellos de Narón en Vilagarcía.
En total, os cinco centros de Industria 4.0 cuxos detalles avanzou a
Xunta este 25 de xuño contarán cun orzamento de 15,6 millóns de
euros. O seu cometido, xuntos e por separado, será permitir ás
pequenas e medianas empresas modernizar a súa produción.
Os
cinco centros foron dados a coñecer polo presidente do Goberno
galego, Alberto Núñez Feijóo, que subliñou que o Centro de
Servizos Avanzados da Cidade das TIC, na Coruña, “ofrecerá ás
empresas galegas un único punto de contacto no que demostrar, facer
prototipos e lanzar proxectos do sector”. A finalidade, dixo, é
servir de enlace entre clientes e provedores de solucións das TIC
(Tecnoloxías da Información e a Comunicación). Este centro contará
con 4 laboratorios para a realización de probas e con espazos para
aloxar empresas do sector. Feijóo salientou que o Concello e a
Universidade da Coruña colaborarán cedendo o uso dunha nave e
habilitando os accesos e a Xunta achegará 4,82 millóns de euros
para o proxecto.
A
segunda iniciativa estará promovida pola Fundación Clúster de
Empresas de Automoción de Galicia (CEAGA) e porase en marcha no
municipio de Salvaterra de Miño, na Plisan. “Trátase de crear un
centro de innovación loxística, aberto para realizar labores de
formación, de demostración e experimentación sobre operacións
reais”, explicou. A Zona Franca de Vigo achegará o terreo e a
construción da nave, mentres que o Goberno galego investirá máis
de 4,3 millóns de euros no equipamento.
No
tocante ao terceiro centro: Sionlla Biotech, Feijóo avanzou que
estará situado no parque empresarial do mesmo nome, en Santiago.
Proverá a empresas biotecnolóxicas e institucións de servizos como
o uso de 22 laboratorios modulares para actividades de I+D+i,
equipamento compartido e instalacións de uso común. A achega da
Xunta para a creación desta infraestrutura superará os 4 millóns
de euros, mentres que o Concello de Santiago de Compostela cederá o
terreo para a construción.
Por
outra banda, o Grupo Intaf será o promotor do centro galego de
tratamentos térmicos do aceiro, que se porá en marcha no municipio
de Narón. A Xunta achega dous millóns de euros para a creación
deste espazo industrial.
Por
último, e promovido polo Clúster TIC Galicia, o Centro de Servizos
Avanzados Galicia TurisTIC porase en marcha en Vilagarcía de Arousa.
Crearase “un espazo de innovación e tecnoloxía que incluirá,
entre outros, un laboratorio de Intelixencia Artificial, unha área
de demostracións e unha área de formación”.
Feijóo
salientou que tres das infraestruturas que se van crear -o Centro de
Servizos Avanzados Cidade das TIC, o Centro Loxístico de Automoción
e o Sionlla Biotech- integraranse nos dous Hubs de Innovación
Dixital.