A Comisión Europea selecciona o proxecto de cooperación da AESIA entre máis de 300 solicitudes

A Axencia Española de Supervisión de Intelixencia Artificial (AESIA), con sede na Coruña, foi seleccionada pola Comisión Europea para participar no programa Technical Support Instrument (TSI) 2026, tras un proceso no que se avaliaron máis de 300 candidaturas dos 27 Estados membro da Unión Europea.
Segundo informa o Goberno, o TSI é o principal instrumento da UE para dar apoio técnico e financeiro aos países da Unión para deseñar e implementar reformas económicas e sociais. Unha das súas iniciativas máis emblemáticas é PACE (Public Administration Cooperation Exchange), na cal se enmarca o proxecto trilateral presentado pola AESIA, Polonia e Lituania.
O proxecto, titulado Improving the implementation of the AI Act in Poland, Lithuania and Spain, ten como obxectivo facilitar o intercambio de experiencias e boas prácticas entre as administracións públicas dos tres países para a correcta aplicación práctica do Regulamento de Intelixencia Artificial (RIA) a través de dúas visitas de estudo.
En concreto, unha delegación de empregados públicos de Polonia e outra de Lituania visitarán ao longo deste ano a sede da AESIA na Coruña, no Edificio da Terraza, para saber como España abordou o desenvolvemento real do Regulamento de IA a nivel nacional e coñecer de primeira man o funcionamento e traballo da Axencia, pioneira no mundo.
Dende a AESIA informan que “este proxecto é un paso máis no recoñecemento internacional da axencia como referente na gobernanza global da IA”. De feito, engaden, a colaboración internacional e o apoio a outros países forman parte dos compromisos da Axencia para lograr un desenvolvemento e uso seguro e consciente da intelixencia artificial.
A AESIA tamén foi seleccionada para participar no Oficina de Asistencia Técnica e Intercambio de Información (TAIEX) da Unión Europea. Neste sentido, xa está a dar apoio técnico e xurídico a países como Armenia, Turquía, Ucraína e Moldavia para colaborar na implementación dun modelo de IA no que desenvolvemento e innovación vaian da man, protexendo ao mesmo tempo os dereitos fundamentais.
A Axencia tamén está inmersa noutros proxectos de apoio e colaboración con países iberoamericanos. Ademais, colabora activamente coa ONU e o seu Laboratorio de Gobernanza da IA para a Humanidade, cuxa directora forma parte tamén do think tank da AESIA. O obxectivo común é favorecer unha gobernanza da IA interoperable a nivel mundial que permita a súa implementación en países de todo o mundo.