A Consellaría de Educación saca a concurso a migración do seu servizo de correo a software libre
mércores, 2 de setembro do 2009
Os galegos e galegas que temos o costume
de mirar o DOG a cotío na procura de iniciativas e proxectos que nos poidan
beneficiar dalgunha maneira, non puidemos máis que sorprendernos (e alegrarnos,
todo sexa dito de paso) cando botando unha ollada no Diario Oficial de onte,
día 1 de setembro, vimos o
anuncio da Consellaría de Educación e Ordenación Universitaria que sacaba a
concurso o servizo de migración da súa plataforma de correo electrónico corporativo
cara a unha arquitectura baseada en software libre.
O
concurso, segundo informa a entidade, está dotado cun importe de 180.000 € con
I.V.E. e require, entre outras cousas, que o desenvolvemento e implantación da
devandita solución baseada en software libre para a plataforma de correo
electrónico inclúa o servizo frontal de correo, o servizo de antispam, o servizo de antivirus, o
servizo de caixas de correo e o servizo de webmail.
A migración da plataforma actual de
correo cara á nova solución deberase facer, en resumidas contas, de xeito que o
usuario non perda ningún tipo de información asociada coa súa conta de correo
electrónico e integrando unha interface web accesible segundo o estándar WAI-AA
da W3C.
Asemade, o mecanismo de autenticación da
solución deberá integrarse totalmente co sistema LDAP corporativo baseado en
OpenLDAP e os mecanismos de comprobación do estado do servizo deberán
integrarse co sistema de monitorización Nagios.
A plataforma de correo electrónico
corporativo desta entidade académica proporciona servizo aos centros
educativos, profesorado, alumnos e servizos centrais da consellería, reunido un
total de 50.000 contas de correo electrónico, que xestionan, segundo puidemos
ler en Mancomún,
“máis de 1.200.000 mensaxes diarias”.
A previsión da consellería é, segundo
engaden na web de Mancomún,”que estas
cifras aumenten considerablemente nos vindeiros anos”, polo que a mellor
solución, en relación calidade prezo, vén sendo pasarse as aplicacións abertas.