A Coruña aposta ao máximo pola accesibilidade na súa nova web educativa
martes, 16 de outubro do 2018
O
Concello da Coruña presentou onte os resultados da renovación da
páxina web de Educación,
un sitio en liña cuxos detalles xa anunciamos os días pasados
incidindo no traballo despregado nela pola empresa Balidea. A
presentación veu
da man da concelleira Silvia Camén, que salientou o importante
ingrediente de accesibilidade que presenta a remodelada páxina web,
un elemento, xunto coa vontade de mobilizar á cidadanía no plano
formativo, que é por así dicilo a peza clave dos traballos acabados
de realizar.
Amais
de presentar melloras neste punto, a web tamén destaca por ser máis
intuitiva, por mellorar a consulta dende móbiles, por incorporar
maior información e por permitir buscas por categorías. Nestes
puntos, a edil fixo saber que un dos grandes obxectivos da
Concellería de Xustiza Social e Coidados foi brindar á comunidade
educativa, ás familias e á veciñanza en xeral “un espazo onde
seguir a actualidade do departamento, consultar o estado dos
diferentes procesos e programas que ten en marcha a concellería ou
acceder a ferramentas ou sistemas de participación na comunidade,
entre outros servizos”.
A
páxina web, que se pode atopar xa no enderezo
www.coruna.gal/educacion,
está agora integrada no portal do Concello da Coruña, do que tomou
o seu deseño base para que “sexa máis familiar e semellante á
web doutros servizos municipais”, o que redunda, en palabras de
Silvia Cameán “nunha navegación máis intuitiva e visual”, e
nunha serie de conexións informativas con outras áreas municipais
que poden ser de interese para a comunidade.