A Coruña reunirá expertos internacionais en procesamento de sinais e comunicacións no SIC’26 Verán

A cidade da Coruña acollerá do 6 ao 10 de xullo a celebración do 13º Obradoiro Español sobre Procesamento de Sinais, Teoría da Información e Comunicacións (SIC’26 Verán), un encontro científico que reunirá investigadores, docentes e profesionais de referencia en áreas clave para o desenvolvemento das Tecnoloxías da Información e das Comunicacións. O evento está organizado por Luis Castedo, investigador do CITIC e catedrático da Universidade da Coruña, xunto con Joaquín Míguez Arenas e Matilde Sánchez Fernández, ambos da Universidade Carlos III de Madrid (UC3M). As inscricións están abertas en liña.
As sesións desenvolveranse no Paraninfo da Reitoría da Universidade da Coruña.
O obradoiro abordará cuestións relacionadas co procesamento de sinais, os algoritmos de aprendizaxe, a teoría da información, as comunicacións e as súas múltiples aplicacións en ámbitos como as redes intelixentes, a intelixencia artificial, as tecnoloxías sen fíos ou os sistemas de análise de datos.
O programa técnico provisional contempla a celebración de conferencias plenarias, seminarios especializados e unha sesión de pósteres dirixida a estudantes de doutoramento e investigadores posdoutorais, fomentando así a participación de novos científicos e a difusión de resultados de investigación emerxentes.
O xoves 9 de xullo, entre as 9:30 e as 16:30 horas, celebrarase o titorial An Introduction to the Principles of Generative Modeling for Signal Processing, impartido por Wolfgang Utschick, da Universidade de Múnic. Nesta sesión abordaranse os fundamentos da modelaxe xerativa aplicada ao procesamento de sinais, unha tecnoloxía clave para mellorar a estimación estatística de parámetros mediante técnicas de intelixencia artificial. O titorial ofrecerá unha introdución a modelos como as redes xerativas antagónicas (GAN), os autoencoders variacionais ou os modelos de difusión, e mostrará a súa aplicación en ámbitos como as comunicacións sen fíos e o procesamento avanzado de sinais. Na páxina web do congreso pode realizarse a inscrición neste tutorial, cunha tarifa de 25 euros.
Ademais, durante toda a semana desenvolveranse actividades de networking vinculadas á Rede Temática ComonSens, unha iniciativa destinada a fortalecer a colaboración entre grupos de investigación españois no ámbito das comunicacións e do procesamento de sinais.
O SIC’26 Verán está organizado e financiado pola Rede Temática ComonSens, a través do proxecto RED2024-153725-T, financiado polo Ministerio de Ciencia, Innovación e Universidades (MICIU), a Axencia Estatal de Investigación (AEI) e o correspondente Fondo Europeo.
Así mesmo, conta co respaldo do programa de actividades de I+D IDEA-CM (referencia TEC-2024/COM-89), concedido pola Comunidade de Madrid a través da Dirección Xeral de Investigación e Innovación Tecnolóxica.
O programa ao completo está dispoñible na web de ComonSens.