A Deputación da Coruña lanza un mapa interactivo sobre financiamento europeo nos concellos
luns, 19 de novembro do 2018
Dende
a Deputación da Coruña anunciábase o pasado venres 16 de novembro
da chegada dunha nova ferramenta dixital que dará conta da variedade
de programas e instrumentos financeiros da provincia e da
participación dos diferentes axentes en cada un deles. Máis polo
miúdo, a Deputación da Coruña, mediante o servizo Europe Direct,
centro oficial de información da Comisión Europea (dependente desta
institución provincial) era o encargado de presentar a dita
ferramenta: un
Mapa de financiamento europeo para a Coruña.
E
cal é a finalidade deste novo recurso? Pois será a de valorar a
participación que a provincia está a ter no marco orzamentario
2014/2020 de cara á negociación do vindeiro orzamento da Unión
Europea para o período 2021/2027. Segundo informou o presidente da
entidade coruñesa, trátase dunha radiografía da captación de
fondos europeos que se está a facer no eido provincial, con 530
proxectos representados dun total dunha ducia de programas, amais de
información sobre os axentes máis activos nos diferentes programas
europeos: concellos, centros educativos, PEME, asociacións, ONG,
axencias, organismos públicos ou fundacións.
O
mapa artéllase en dúas fases. Na primeira, compila datos sobre oito
programas europeos de xestión directa por parte da Comisión Europea
(Europa cos cidadáns, LIFE, Erasmus +, Horizonte 2020, Conectar
Europa, Programa PEME, Europa Creativa, Xustiza), así como catro
programas de Cooperación Territorial Europea, financiados con FEDER,
nos que poden participar entidades da provincia (Interreg Espazo
Atlántico, Interreg Europe, Interreg España-Portugal, Interreg
SUDOE).
O
programa europeo que conta cunha maior participación por parte dos
concellos é Europa cos cidadáns, con 29 proxectos dos 30 totais que
até o momento lograron a aprobación da Comisión Europea neste
período orzamentario.
Erasmus
+, o programa europeo para educación e mocidade, figura a
continuación coa participación de concellos coruñeses en 21
proxectos, que supoñen un total de case medio millón de euros. En
total, os 310 proxectos Erasmus + aprobados na provincia supoñen un
financiamento europeo de máis de 21 millóns de euros.
A
Deputación tamén fixo saber que “sen tomar en conta ao tres
concellos con maior poboación”, os municipios que están a ser
máis participativos neste período orzamentario nos programas
europeos mencionados son A Baña, Curtis e Abegondo. O mapa, aberto
ao público, pódese consultar na
web da Deputación.