A Deputación de Lugo achega formación en tecnoloxías SIX aos técnicos dos concellos

martes, 10 de marzo do 2020 Redacción

A Deputación de Lugo está a formar a técnicos municipais de toda a provincia no uso do Sistema de Información Xeográfica (SIX) gracias a un curso de capacitación de 30 horas impartido por técnicos da Universidade de Santiago (Campus de Lugo). A formación, orientada á xestión na Administración local, é de balde e comezou este luns na aula principal do Edificio Cactus do Campus Terra. Ao seu abeiro, participarán unhas 15 persoas. A actividade forma parte do convenio que a entidade provincial mantén coa USC.
O curso está destinado ao persoal da Administración local que necesite obter información de mapas sen que sexa necesario dispoñer de coñecementos especiais de informática gráfica ou xeográfica. O obxectivo é introducir aos traballadores dos concellos nas máis recentes ferramentas tecnolóxicas para o uso e tratamento da información territorial, difundir os recursos cartográficos existentes en Internet e na Deputación, fomentar a creación de SIX municipais, así como establecer liñas de comunicación máis áxiles e eficaces para o intercambio de información territorial.

PUBLICIDADE