A Deputación de Lugo e Federación de Comercio lanzan campaña para elixirmos online os mellores establecementos

O presidente da Deputación de Lugo, José Tomé Roca, presentou este martes 14 de novembro, no Pazo de San Marcos e na compaña do presidente da Federación Galega de Comercio, José María Seijas, a campaña Mellor Comercio da túa vila, financiada practicamente na súa totalidade pola institución provincial cunha achega de 50.000€ e destinada a impulsar os establecementos de proximidade da provincia e incentivar as vendas na recta final do ano. A iniciativa inclúe premios para os propios negocios participantes, por un total de 8.500€, e para os clientes, en bonos de compra que suman 15.000€. Tamén incorpora unha votación en liña para elixir os mellores comercios da provincia.
A campaña, explicou Tome, ten un obxectivo duplo: “Por unha banda poñer en valor a calidade e as melloras que van introducindo os comercios para promocionarse, modernizarse e alcanzar cotas máis altas de competitividade, e pola outra incentivar as vendas nesta recta final do ano, aproveitando que son datas de maior consumo”, nas que, de feito, concéntrase o 40% da facturación anual do sector do comercio.
A campaña, que comeza este 14 de novembro e rematará o 14 de decembro coa celebración dunha Gala do Comercio no Pazo de San Marcos, inclúe distintas accións: premios para 17 negocios da provincia de 500€ cada un e un diploma acreditativo; sorteo de bonos por 12.000€ entre os clientes; e actividades de dinamización nas rúas da capital lucense e sorteo dun premio de 3.000€ en compras.
A campaña arranca este 14 de novembro. Ata o 7 de decembro, aquelas persoas que realicen compras en calquera comercio de proximidade da provincia de Lugo poderán rexistrar os seus tíckets a través da web www.mellorcomerciodatuavila.com e entrar nun sorteo previsto para o 11 de decembro no Pazo de San Marcos, no que se repartirán 12.000€ en vales de compras, repartidos en 20 premios de 300€ e 40 premios de 150€. Durante ese rexistro, os clientes poderán votar a un comercio de entre os previamente inscritos no concurso, e desa votación popular vía online sairán os 17 negocios que se distinguirán como Mellor Comercio da túa vila. Os gañadores recibirán de premio 500€ en metálico cada un, e un diploma acreditativo, dos que se lles fará entrega na devandita gala.
A campaña que impulsa a Deputación de Lugo coa Federación Galega do Comercio tamén contempla o desenvolvemento doutra acción na cidade de Lugo baixo o nome Merca na Rúa, coa que se desenvolverán actividades de dinamización entre os días 1 e 12 de decembro para fomentar as vendas do comercio local. Entre as persoas que fagan unha compra durante estes días, sortearanse 3.000€ para gastar nunha xornada de compras que se celebrará o 13 de decembro, de 17:00 a 20:00 horas. O premiado deberá visitar polo menos oito tendas participantes na campaña e gastar un mínimo de 100 euros en cada unha delas.