A Deputación de Lugo e a EOI lanzan un ambicioso programa para facer realidade a dixitalización de pemes e autónomos

mércores, 20 de outubro do 2021 S. P.

A Deputación de Lugo e a Escola Organización Industrial (EOI) presentaron este 20 de outubro unha iniciativa conxunta para axudar ás pemes e ás persoas autónomas, con formación de balde, nos seus procesos de transformación, dixitalización e adaptación ás novas demandas e realidades do mercado (no contexto postCOVID). O programa foi dado a coñecer polo presidente da entidade provincial, José Tomé Roca, e o director do departamento de Aceleración Empresarial da EOI, Javier Benito. Trátase do programa Reiníciate: dixitaliza a túa empresa, unha nova iniciativa dotada con máis de 1M€ de orzamento que prestará apoio gratuíto a pemes e persoas autónomas da provincia para mellorar o seu negocio a través da dixitalización.
José Tomé, que estivo acompañado tamén polo deputado de Promoción Económica e Social, Pablo Rivera, explicou que Reiníciate: dixitaliza a túa empresa forma parte do Plan de Impulso da Economía da Provincia lanzado pola Deputación para favorecer a recuperación do tecido produtivo fronte ao impacto da pandemia.
“Trátase dun programa de formación e de asesoramento personalizado que ofrecemos de maneira totalmente gratuíta ás empresas para axudarlles a aproveitar os recursos das novas tecnoloxías para modernizar e mellorar o seu negocio”, subliñou o presidente, engadindo que Reiníciate está promovido pola Deputación e a EOI cun orzamento de 1.080.000€, achegados nun 85,9% pola Escola de Organización Industrial a través do Fondo Social Europeo, que supón 927.720€. A Deputación asume o 14,1% restante, o que supón 152.279€.
Segundo recalcaron, esta nova iniciativa nace co obxectivo de que as empresas “gañen en competitividade, en produtividade e en eficiencia, para que abran novas oportunidades de negocio e, polo tanto, para que teñan ferramentas que lles sirvan, por unha banda, para recuperarse antes e de maneira máis sustentábel no tempo dos efectos da crise da COVID e, pola outra, para que poidan incluso estar mellor preparadas de cara a futuras situacións adversas”.
500 empresas dos 67 concellos
Tomé engadiu que Reiníciate está dirixido a 500 empresas de calquera sector ou actividade, e de calquera dos 67 concellos da provincia de Lugo. Segundo engadiu, é unha proposta aberta e dinámica, onde non existe límite en relación ao tamaño das empresas, aínda que iso si, porase o foco, especialmente, no ámbito das pemes (as pequenas e medianas empresas) e as persoas autónomas, que son, dixo, “o verdadeiro músculo da nosa economía, o motor da creación do emprego, e os que máis están a sufrir os efectos da crise da COVID”.
O programa abrangue “un acompañamento real, individualizado e personalizado” para cada unha das empresas que decidan beneficiarse desta iniciativa, facilitando que cada unha delas teña o seu propio ritmo e un plan para dar resposta ás súas necesidades específicas “da mellor maneira posíbel”. Amais, “a formación partirá dende o punto no que estea cada negocio participante en materia dixital”. Tomé Roca puxo como exemplo que algunhas empresas terán que empezar por implantar as redes sociais e outras porán en marcha o comercio en liña. A finalidade é “lograr que as persoas participantes adquiran os coñecementos, as habilidades e as ferramentas necesarias para desenvolver a transformación dixital da súa empresa”. En concreto, engadiu, “levaranse a cabo accións prácticas como a realización ou actualización da páxina web, a creación ou mellora das redes sociais, o posicionamento na rede, a mercadotecnia dixital ou a implantación de programas de xestión ou facturación, entre outras”.
Inscricións e desenvolvemento
O prazo de inscrición xa está aberto e pódese formalizar na web: lugoformaciondigital.es. Habilítase o teléfono 982 26 02 04 para resolver dúbidas que poidan xurdir. A previsión é que o programa arranque xa na primeira semana de novembro.
A Deputación de Lugo indicou que a axenda inclúe sesións en liña e presenciais, destinando tempo ao asesoramento individualizado, á formación e ao acompañamento. “A cada empresa asinaráselle un profesional que será o seu mentor durante todo o programa”, explicouse, engadíndose que estas persoas serán as encargadas de facer a avaliación inicial e de establecer o plan de traballo en función das necesidades detectadas. Para a formación haberá 80 horas que se impartirán en horario de mañá e de tarde durante tres días á semana, e 85 horas para a mentorización personalizada e adaptada a dispoñibilidade de cada empresa.
Establécense sete sesións presenciais, que se impartirán nas diferentes comarcas, co obxectivo de chegar ao maior número de destinatarios. As temáticas previstas son: Xestión de dixitalización (Lugo), Desenvolvemento de negocio dixital (A Mariña), Reto en dixitalización (Ribeira Sacra), Reto en comunicación dixital (A Terra Chá), Reto de competencias directivas (Lugo), Reto de transición enerxética (A Mariña), e COVID, a oportunidade do cambio (A Ulloa).

PUBLICIDADE