A Deputación de Lugo ofrece formación tecnolóxica para axudar a fixar poboación

A voceira socialista do Goberno provincial, Pilar García Porto, anunciou este venres 10 de novembro unha nova iniciativa promovida pola Deputación para dinamizar o tecido social e económico, e fixar así poboación, consistente nunha acción formativa, gratuíta e especializada, que permitirá obter aos participantes o título de Diplomado Especialista en Territorio Rural Intelixente, “o único curso desta temática que existe na actualidade na oferta educativa”, dixo.
Dirixida polo prestixioso xornalista e doutor en Socioloxía Manuel Campo Vidal, a formación, que arrancará a finais de mes, conta con 75 prazas, está enfocada aos axentes sociais e económicos que traballan pegados ao territorio (ben sexa persoal da administración local; alcaldes, alcaldesas ou concelleiros; emprendedores; ou calquera persoa ou entidade interesada no impulso do rural), e aborda materias como a organización de proxectos, sustentabilidade, dixitalización ou comunicación de iniciativas de desenvolvemento.
O curso ten unha duración de 20 horas, distribuídas nunha xornada presencial, que impartirá Manuel Campo Vidal na Deputación, e clases en liña. Contará con 9 bloques temáticos, entre eles, as claves da transformación dixital, o equilibrio territorial ou o turismo rural como factor de desenvolvemento.
As persoas interesadas poden inscribirse a través da páxina web da Deputación de Lugo, dende este venres e durante unha semana, é dicir, ata o vindeiro venres, 17 de novembro.