A Deputación de Lugo pon a disposición dos concellos recursos para traballar telematicamente
luns, 6 de abril do 2020
A
Deputación de
Lugo anunciou esta fin de semana que vai poñer a disposición dos 67
concellos unha serie de recursos para poderen seguir desenvolvendo a
súa actividade de xeito telemático. En termos máis concretos,
a entidade provincial bríndalles asistencia técnica, asesoramento e
colaboración. O obxectivo é que poidan celebrar a distancia plenos,
xuntas de goberno e órganos colexiados en xeral, botando man das
novas tecnoloxías e garantindo deste xeito a operatividade en Estado
de Alarma e, tamén, as máximas medidas de seguridade e protección
derivadas da crise sanitaria.
Trátase
dun novo servizo gratuíto de cooperación cos municipios baixo
demanda a través do departamento de Novas Tecnoloxías da Deputación
de Lugo. Segundo fixo saber o presidente José Tomé, “queremos
facilitar a xestión municipal con total garantía e seguridade nesta
situación de crise sanitaria provocada polo coronavirus COVID-19”.
Tomé
tamén tivo palabras para salientar os bos resultados acadados co
pleno telemático que se celebrou o 3 de abril, o primeiro na na
historia da Deputación de Lugo que se desenvolve pola vía
telemática. Agora, a institución provincial ofrece aos concellos “o
mesmo protocolo de desenvolvemento operado polo servizo de Novas
Tecnoloxías”. Segundo fixo saber, funciona a través dunha
aplicación de videoconferencias na Rede que permite conexións entre
todo tipo de dispositivos (ordenadores de sobremesa e portátiles,
teléfonos móbiles ou tabletas). “Trátase”, dixo, “dunha
ferramenta doada de usar e intuitiva”.
Cada
particularidade
O
servizo de Novas Tecnoloxías da Deputación estudará a
particularidade de cada consistorio solicitante e recomendaralle a
solución tecnolóxica “máis acorde coas súas características e
medios dispoñíbeis. Tomé sinalou que estanse a ofertar varias
opcións de colaboración, dende só asesoramento ata facer un
seguimento de toda a sesión e a retransmisión por streaming
a través da canle de YouTube do Servizo de Audiovisuais da
Deputación de Lugo.
Con
esta nova medida, a Deputación continúa adoptando as decisións ao
seu alcance para “cooperar cos concellos na loita para paliar os
efectos da crise sanitaria, axudándolles a que podan seguir
traballando, coa maior normalidade posíbel, en todos aqueles
trámites que teñen como obxectivo a mellor atención á veciñanza.
O
soporte técnico ofrecido pola Deputación permite ós concellos que
poidan continuar celebrando, “de maneira segura e eficaz”, todas
aquelas sesións de órganos colexiados que resultan importantes ou
mesmo imprescindíbeis “para sacar adiante trámites, procedementos
ou medidas que inciden no benestar da cidadanía e no impulso da
actividade económica do municipio”, explicou o presidente,
engadindo que a Deputación responde con esta iniciativa á súa
función esencial como “Concello dos Concellos”, un instrumento
clave de cooperación e integración.
Tomé
tamén dixo que a asistencia para celebrar órganos colexiados vía
telemática súmase á que “xa vén ofrecendo a Deputación de
maneira habitual en materia xurídica, de recursos humanos ou
económico-financeira, entre outras moitas liñas de colaboración”.