A Deputación de Ourense acometerá os seus plans de desenvolvemento en consenso coa cidadanía

A Deputación de Ourense vén de anunciar que vai pór en marcha unha iniciativa de participación cidadá, apoiada nas novas tecnoloxías, para impulsar o desenvolvemento urbano sustentable e integral da provincia. A medida, segundo informou os días pasados o presidente da entidade, Manuel Baltar, abrolla da vontade do Goberno provincial de habilitar plans “que conten con consenso da cidadanía”. Esta campaña de participación poderase realizar por medio de enquisas, encontros cos axentes sociais e unha caixa de correo específica para recoller ideas. As achegas recibidas serviralle á Deputación para elaborar iniciativas nos ámbitos medioambiental, económico e social.
Na enquisa –á que se poderá acceder desde a web da Deputación de Ourense- recolleranse opinións e suxestións dos cidadáns, e proporánselles cuestións sobre os principais problemas e retos da provincia así como sobre as posibles solucións. A caixa de correo abrirase por medio da Unidade de Transparencia “para que calquera cidadán, organización ou colectivo faga chegar ás súas propostas por escrito”. No que se refire á concorrencia dos axentes sociais, asociacións e sociedade civil, “organizaranse encontros con todos estes estamentos para escoitar directamente as súas opinións e propostas”, sinalou a Deputación, que engadiu que o obxectivo é acadar que a provincia se artelle arredor de catro eixes: sustentabilidade do medio ambiente (Provincia Verde), tecnoloxías smart (Provincia Intelixente), recursos para a competitividade e o desenvolvemento económico (apoio aos emprendedores, PEME e conxunto de empresas en xeral) e pulo ao termalismo (“un dos principais activos da provincia e que é preciso potenciar dende unha óptica integral”.)
Segundo informa a Deputación, tirando proveito de toda esta bagaxe cidadá porase especial fincapé na liña de axudas europeas referida, precisamente, ao Desenvolvemento Urbano Sostible Integrado, cuxa finalidade é apoiar ás administracións locais á hora de afrontar os seus retos. Máis en detalle, a entidade provincial ten programada unha estratexia específica para dispoñer dunha folla de ruta coa que levar a cabo proxectos de sustentabilidade no territorio e complementar o seu acceso ás axudas (cuxa convocatoria será publicada os vindeiros días polo Ministerio de Facenda). Entre os devanditos proxectos figuran iniciativas sobre o uso das tecnoloxías da información, a transición a unha economía baixa en carbono, o impulso a políticas medioambientais e a inclusión social. “Trátase de traballar por un desenvolvemento integrado que non se centre só en obras senón que poña en marcha proxectos vivos e con contidos que contribúan ao desenvolvemento da provincia", explicou o presidente da Deputación.