A Deputación de Ourense debulla ante os concellos os seus servizos para faceren fronte aos ciberataques

Os concellos ourensáns disporán dun servizo gratuíto para garantir a seguridade das súas instalacións e documentos dixitais grazas á adhesión da Deputación de Ourense ao Centro de Operacións de Ciberseguridade para as Entidades Locais (COCS_EELL). O director da Área de Transparencia e Goberno Aberto, Marcos Valiño, xunto cos responsables da empresa adxudicataria do programa, explicaron aos representantes municipais, nun encontro no Centro Cultural Marcos Valcárcel, a necesidade do proxecto, o seu alcance e obxectivos que se pretenden alcanzar.
“Nun mundo cada vez máis dixital”, destacou Marcos Valiño, “a Deputación de Ourense foi quen de captar os recursos e o financiamento necesarios para proporcionar todo tipo de servizos de ciberseguridade aos concellos da provincia de forma gratuíta e durante 5 anos”.
Os recursos que se ofrecen e que serán xestionados pola Deputación xiran en torno a cinco eixos fundamentais: prevención, protección, detección, resposta e asesoría. Desta forma, explicou Valiño, “facilitaranse aos concellos ferramentas e equipamentos que posibilitarán a prevención e detección temperá de incidentes, así como servizos de resposta inmediata e xestión de crises ante calquera incidente de ciberseguridade”.
Valiño reiterou que o proxecto que se inicia esta tempada proporcionará aos concellos ourensáns, en termos de seguridade cibernética, “apoio especializado a través dos técnicos do citado departamento en liña coas últimas tecnoloxías, así como asesoría e asistencia técnica para implantar estes servizos e evitar ciberataques de difícil reparación”. Amais, dotarase ás administracións locais de análises previas da situación actual de cada concello, co fin de valorar as necesidades particulares e definir as necesidades reais para cada caso.
Este proxecto, enmarcado na política de asistencia permanente aos concellos, reafirma a intención da Deputación de Ourense de “buscar financiamento e recursos que permitan asistir e axudar ás entidades locais en ámbitos de difícil aplicación e xestión como a ciberseguridade”.