A Deputación de Ourense facilita aos cidadáns a consulta telemática de expedientes

A Deputación de Ourense deu este mes un novo paso en materia de dixitalización. Fíxoo coa integración na Carpeta Cidadá da Administración Xeral do Estado, un servizo que permite á veciñanza consultar nun único espazo notificacións, expedientes, avisos e alertas de distintas institucións simultaneamente.
O Goberno provincial informou que xa ten activo o servizo telemático, “no que os habitantes de toda a provincia poderán consultar de maneira sinxela e áxil os seus documentos relacionados neste caso coa Deputación de Ourense”.
A entidade provincial explicou que unha das principais vantaxes do servizo é “que o cidadán pode consultar nunha mesma interface comunicados de diversas institucións, entre as que agora se atopa a Deputación; deste xeito os usuarios non teñen que acceder á sede electrónica de cada un dos organismos de forma independente, senón que a través dun único punto poden visualizar todas as xestións pendentes coas administracións”. Ademais, non terán que desprazarse ás oficinas da Deputación para consultar o estado dos seus expedientes.
A entidade provincial salienta tamén que a Carpeta Cidadá ofrece servizos telemáticos completos desde calquera computador con acceso a Internet e en calquera momento; tanto de xestións que requiren acreditación de identidade como de servizos que non a precisan.
A Deputación explica a maiores que “calquera persoa interesada nos servizos que poderán encontrar no apartado Tramitar por Internet da Carpeta Cidadá pode solicitalo sen requirimento algún”. Os servizos que requiren acreditación da identidade poden ser utilizados por aquelas persoas físicas, maiores de idade, que sexan terceiros da Deputación.