A Deputación de Ourense redobrou investimentos, formación e iniciativas en materia de ciberseguridade

A Deputación de Ourense achegou este xoves 7 de setembro detalles sobre a súa estratexia para salvagardar as súas información, infraestruturas e comunicacións de todo tipo de ataques, ameazas, riscos ou vulnerabilidades. Fíxoo nunha reunión celebrada con representantes do Concello de Contas de Galicia, onde a vicepresidenta da entidade provincial, María Nóvoa, reiterou “a total colaboración da institución ourensá co Consello para a mellora da ciberseguridade na Deputación”. Na xuntanza, os membros do Consello deron a coñecer os resultados do informe de fiscalización dos controis básicos de ciberseguridade na Deputación, correspondente ao exercicio 2022.
A vicepresidenta, que estivo acompañada polo director da área de Transparencia, Fernando Suárez, e técnicos da institución, cualificou de “intenso” o traballo que vén de facer a Deputación na protección dos seus sistemas informáticos, con máis investimentos, formación e iniciativas de concienciación cara a loita contra as intrusións na rede corporativa.
Neste sentido, dixo, a auditoría reflicte unha boa valoración no capítulo das copias de seguridade, "ferramenta fundamental para crear barreiras contra os ataques dos piratas informáticos". O mesmo informe, lembrou, “valora positivamente a fortaleza do centro de proceso de datos, que acolle toda a infraestrutura que dá soporte tecnolóxico á institución, así como os sistemas de control de acceso”.
Os resultados desta auditoría, engadiu Nóvoa, "non son estáticos, senón dinámicos no tempo e non dubido que o labor que se realiza ficará reflectido na valoración que se realice en próximas análises". Referíase a vicepresidenta á implantación de novas ferramentas que complementan os antivirus, cunha análise continua da rede e os equipos informáticos para detectar, identificar e previr ameazas avanzadas, ademais de novos sistemas en colaboración co Centro Criptolóxico Nacional.
Marta Nóvoa salientou tamén a cooperación cos concellos en todos estes ámbitos, "sendo seleccionado para financiar con fondos Next Generation un proxecto que permitirá estender aos concellos o servizo de copias intelixentes de seguridade".
A auditoría do Consello de Contas de Contas en ciberseguridade forma parte dun plan desta institución que, antes de que remate o presente exercicio, tamén se aplicará no resto das deputacións galegas, sendo Ourense a primeira delas.