A Deputación de Pontevedra achega esta semana catro obradoiros para pemes e autónomos

Ao longo desta semana que comeza hoxe (luns, 12 de xuño) a Deputación de Pontevedra, a través do programa SmartPeme de asesoramento tecnolóxico para pemes e persoas autónomas, oferta catro novas accións formativas inseridas na súa carteira de obradoiros que se celebrarán de xeito telemático e presencial. Os obradoiros centraranse no deseño dun contrasinal seguro, na fabricación dixital e na promoción do negocio con perfil de empresa de Google.
A primeira das xornadas daba comezo hoxe, luns 12 de xuño, ás 10h con Ciberseguridade, como facer un contrasinal seguro, sobre a importancia de ter un contrasinal axeitado para protexer a información. Manuel Freire, experto universitario en robótica, programación e impresión 3D dirixirá este curso.
Mañá, martes 13, segue a formación con Fabricación dixital. Debuxo con Onshape VI-Assembly II, ás 11h, tamén da man de Manuel Freire. O obradoiro forma parte das 30 horas da formación teórica en liña dividida en 4 seccións: debuxo 3D con Onshape (16h), impresoras 3D de filamento (8 h), impresoras 3D de resina (4h) e escáner 3D (2h). Asemade, complétase con 20 horas de formación práctica sobre o uso de impresoras 3D de filamento (8h), impresoras 3D de resina (8h) e escáner 3D (4h) no Fab Lab do Centro Provincial de Economía Dixital no Viveiro de Empresas de Barro (Pontevedra).
O mércores 14 o obradoiro terá lugar ás 12h e centrarase en Promociona o teu negocio con perfil de empresa de Google. O dito encontro está encamiñado a empresas locais que queiran mellorar a súa visibilidade con Google e será impartido por Adrián Fernández, licenciado en Comunicación Audiovisual e asesor de empresas de diversos sectores no eido da comunicación dixital e na mercadotecnia en liña.
A semana de obradoiros rematará o xoves 15 con Fabricación dixital. Impresoras de resina. O experto universitario en robótica, programación e impresión 3D, Manuel Freire, será o encargado de impartir esta formación.