A Deputación de Pontevedra porá unha plataforma de comercio ao servizo de oito concellos

A Deputación de Pontevedra porá en marcha unha plataforma entre negocios para crear unha rede de comercio local en oito concellos. En concreto, a súa finalidade será “captar, asesorar, dinamizar, visualizar, formar, sensibilizar e interconectar axentes do comercio local con produtores locais e provedores de servizos afíns para crear a rede de comercio local nos concellos de Arbo, Campo Lameiro, Cuntis, Forcarei, Meis, Mondariz, As Neves e Rodeiro”.
Os detalles desta iniciativa foron dados a coñecer polo presidente da Deputación, Luis López, que incidiu en que “se queremos construír unha terra de oportunidades para todos, na que se xeren postos de traballo e dinamice a economía, debemos apostar polos sectores produtivos”.
Esta plataforma, que conta con orzamento de 230.000 euros e se pon en marcha ao abeiro do proxecto Da túa man (rural), financiado pola Unión Europea a través dos fondos Next Generation, é “unha aposta innovadora, tanto no enfoque como no desenvolvemento da mesma, que contribuirá a unha mellora da produtividade do comercio e da hostalaría nos concellos, creando vínculos comerciais e estreitando e fortalecendo as relacións de subministro”, explicou o presidente provincial, engadindo que ao abeiro este proxecto configurarase como unha comunidade de aprendizaxe, permitindo compartir coñecementos e experiencias que contribúan a mellorar a produtividade, incrementar as vendas e engadir valor aos produtos e servizos.
A plataforma contará con dúas partes: unha parte pública, dixital, que permitirá á cidadanía acceder aos contidos xerados: mapa, da provincia coas diferentes experiencias, información medio ambiental, etc., e unha parte privada á que terán acceso os comerciantes e hostaleiros dos concellos mencionados, e na que poderán interactuar e establecer relacións comerciais os axentes implicados, compartir experiencias e información e dispoñer de titoriais de expertos, entre outros.