A Escola de Enxeñaría Informática de Ourense amosa as vantaxes de facer un sistema ERP a medida
martes, 11 de xullo do 2017
Os
sistemas de planificación de recursos empresariais, os ERP, foron
en boa medida os protagonistas dunha xornada celebrada hoxe na Escola
Superior de Enxeñaría Informática (ESEI) do Campus de Ourense.
A sesión contou coa presenza de Emilio Estévez, director xerente de
Coplant Galicia, empresa estatal referente en comercialización de
plantas ornamentais vivas. Estévez achegou a súa visión particular
dos detalles da implantación dun ERP nunha compañía (no seu caso,
Coplant) e, tamén, subministrou datos sobre a longa e frutífera
relación que manteñen dende 2010 a empresa que representa e os do
Laboratorio de Informática Aplicada Lia2, con sede na ESEI. Froito
deste traballo conxunto a entidade conta na actualidade cun sistema
tecnolóxico de xestión da información que lle permite dar resposta
ás súas necesidades internas e externas.
Segundo explicou
Francisco Javier Rodríguez, un dos investigadores que participa nos
proxectos con Coplant (e director tamén da Escola Superior de
Enxeñaría Informática que organizou a conferencia), a relación
con esta empresa naceu a través dun proxecto de “intelixencia de
negocios” no que se evidenciou “como a empresa necesitaba
mellorar toda a súa parte de tecnoloxía”. O seguinte paso,
sinalou, foi “detectar cun equipo de traballo máis amplo as
necesidades que tiña de ferramentas tecnolóxicas tendo en conta as
súas características” e deseñar un sistema integrado, “subindo
de nivel tecnolóxico a compañía”. Como resultado da experiencia
adquirida, indicou Rodríguez Martínez, investigadores do grupo que
participaron no proxecto crearon unha empresa tecnolóxica para
ofrecer este e outros servizos tecnolóxicos.
Pola
súa banda, o director xerente da empresa Coplant Galicia explicou
como ao longo dos proxectos levados a cabo co grupo Lia2 el e máis a
súa equipa traballaron a integración da información e a
tecnoloxía. Tamén fixo saber que a día de hoxe a firma que
representa ten unha facturación anual superior aos seis millóns de
euros e xera emprego director a arredor de 150 persoas, sendo o
primeiro empregador do Concello de Tomiño, onde ten a súa sede.
Asemade, fixo saber que Coplant comercializa tanto no eido estatal
coma no principais mercados europeos: Francia, Reino Unido, Alemaña,
Holanda, Bélxica, Portugal, Italia e Dinamarca.
O obxectivo nos
proxectos desenvolvidos entre os membros de Coplant Galicia e os
investigadores do Campus foi a integración do sistema dos
produtores, do sistema de comercializadores e o da propia empresa, de
xeito que os tres estiveran integrados nun único sistema. Deste
xeito, detalla, se un cultivador dá de alta unha planta no sistema,
esta xa se pode comercializar en calquera dos seus puntos. Ademais,
explica, na posta en marcha deste deseño de xestión da información
e recursos tamén se tivo en conta a páxina web da entidade e a
venta a través dela.