A FECYT selecciona como exemplo de práctica innovadora o proxecto Incrúst@te da UDC
martes, 20 de abril do 2021
A
Fundación Española para a Ciencia e a Tecnoloxía (FECYT) vén de
seleccionar unha iniciativa tecnolóxica da Universidade da Coruña
como exemplo de práctica innovadora. Trátase do proxecto
Incrúst@te, programa de divulgación científica
para estudantes de Secundaria e Bacharelato no Centro de
Investigacións Científicas Avanzadas (CICA) da UDC.
A
Fundación Española para a Ciencia e Tecnoloxía (FECYT) vén de
publicar a oitava edición deste catálogo, o cal reúne as mellores
15 prácticas innovadoras presentadas en 2017 á convocatoria de
axudas para o fomento da cultura científica, tecnolóxica e da
innovación.
Na
devandita convocatoria, a FECYT recibiu un total de 645 solicitudes,
das cales 205 acabaron sendo financiadas, Incrúst@te entre
elas. A FECYT desenvolveu a
plataforma Divulgateca para permitir a consulta das fichas
técnicas de todos os proxectos financiados.
A
contribución do CICA
O
proxecto Incrúst@te nace en 2017 co obxectivo de introducir
estudantes na carreira investigadora a través dunha serie de visitas
e estadías curtas, onde os mozos e as mozas entran en contacto con
investigadores e investigadoras do CICA. Cada ano, o centro de
investigación recibe unha media de 250 estudantes con idades
comprendidas entre 14 e 17 anos. Durante a visita, coñecen a
dinámica de traballo nun centro de investigación, e en particular
as liñas desenvolvidas no CICA. Na seguinte fase, selecciónanse 16
estudantes que gozan dunha estancia curta nun dos grupos de
investigación, a cal culmina coa elaboración dun póster e a
participación no seu primeiro congreso científico. Na última fase
de Incrúst@te, os 4 mellores estudantes, seleccionados en
base ao aproveitamento da súa primeira estadía e ao interese
científico mostrado, realizan unha segunda estancia de 2 semanas
para levar a cabo o seu propio proxecto de investigación.
A
UDC lembra que “son moitos os centros de estudos galegos que xa
participaron no proxecto”, o cal conseguiu establecerse como unha
actividade altamente demandada polo alumnado de secundaria da
provincia da Coruña.
Incrúst@te
foi realizado en colaboración coa Fundación Española para a
Ciencia e a Tecnoloxía (FECYT) - Ministerio de Ciencia, Innovación
e Universidades en 2017 e 2018, a través de dúas convocatorias
consecutivas de axudas para o fomento da cultura científica,
tecnolóxica e da innovación. O proxecto tivo continuidade a partir
de 2019 grazas ao financiamento da Xunta de Galicia.