A Fundación Araguaney avalía como afectan á ficción as novas plataformas
mércores, 3 de outubro do 2018
A
Fundación Araguaney-Ponte de Culturas organiza este 4 de outubro un
foro sobre os nosos novos xeitos de consumir audiovisual e ficción
televisiva, uns xeitos que mudaron para sempre (sen volta atrás)
dende a aparición das plataformas de TV dixital e de servizos como
YouTube. O
foro, titulado Da idea á pantalla: a realidade da ficción
televisiva estará aberto ao público en xeral. Comezará ás
20:30 horas no Hotel Eurostars Araguaney de Santiago, contando coa
participación de catro expertos referenciais en novas canles e novos
contidos (e en como as novas canles tamén son quen de dirixir o
rumbo dos contidos, condicionándoos e influíndo en argumentos e
propostas).
O
guionista, director e produtor executivo de diversas compañías,
Pepe Coira; a vicepresidenta de Negocio Internacional de Atresmedia
Estudos, Laura Miñarro; e o socio fundador e director xeral de Onza
Partners, Gonzalo Sagardía, participarán no foro organizado pola
Fundación Araguaney, que estará moderado polo produtor e director
de cinema, e presidente do Clúster Audiovisual Galego (CLAG), Jorge
Algora.
Segundo
avanza Gonzalo Sagardía, a fragmentación de canles e a nova forma
de consumir televisión inflúen dunha maneira transcendental na
produción televisiva, “non só mudando os hábitos de consumo,
senón que a plataforma de consumo dalgunha maneira condiciona tamén
o tipo de produto, modificando igualmente o fin da produción”.
O
director xeral de Onza Partners, a maiores, sinala que hoxe non
perseguen o mesmo Antena 3 e Telecinco que Netflix e Amazon, “xa
que os negocios cambian e a maneira de rendibilizalos tamén”.
Segundo engade, “o sector está nun intre de transformación que
aínda non está totalmente definido e os próximos anos van ser
apaixonantes para produtores e tamén para distribuidores”.
Sagardía
tamén pon o foco nos tipos de plataforma que se nos ofrecen e en
como estes non só poden determinar argumentos, senón a repercusión
final de cada produto. “O tipo de plataforma condiciona tamén a
tipoloxía de historia de ficción”, sinala, aludindo a casos
concretos como á serie A Casa de Papel, que emitiu nun
principio Antena 3 (onde “non rematou de funcionar”) e que logo
foi retomada (con éxito mundial) por Netflix. “As series que
contan con grandes xiros de guión deseñados para atrapar ao
espectador funcionan mellor en plataformas que permiten un consumo
continuado que en canles lineais. Para determinados espectadores
esperar unha semana entre un capítulo e outro é demasiado. Precisan
dun consumo máis obsesivo para gozar plenamente do seu
entretemento”.