A Fundación CEL introdúcenos de balde nos segredos da mercadotecnia dixital para cooperativas
luns, 10 de xullo do 2017
A Fundación CEL
Iniciativas por Lugo quere repetir o éxito colleitado na primeira
edición (en 2016) das súas actividades formativas de balde sobre
mercadotecnia dixital para cooperativas. Por esta razón, volveu
convocar para a volta do verán, xa no mes de setembro, dous
cursos sobre marketing en liña especialmente dirixido ás
devanditas entidades colectivas e, tamén, ás sociedades laborais de
recente creación e emprendedores de economía social. Os
obradoiros serán impartidos por Raúl Ordóñez, profesional con
máis de dez anos de experiencia, especializado en mercadotecnia e
comunicación en liña, formación e consultoría tecnolóxica,
blogues, redes sociais, goberno aberto e estratexias dixitais no
mundo empresarial e organizacional.
No primeiro deles, que se
desenvolverá do 11 ao 14 de setembro en horario de tarde, a
intención é aprender aos participantes a instalar, configurar,
xestionar e optimizar WordPress, o popular xestor de contidos
(empregado hoxe en día en tres de cada catro webs corporativas do
planeta, segundo lembran dende a Fundación CEL). Xunto aos aspectos
técnicos, tamén se abordarán as claves para desenvolver unha
estratexia de mercadotecnia de contidos axeitada para un negocio ou
proxecto a través desta ferramenta.
No segundo curso (do 19
ao 21 de setembro) os participantes entrarán en contacto coa
importancia que teñen as redes sociais como canles de comunicación,
promoción e venda. O obradoiro abordará algunhas das máis
importantes comunidades dixitais, como Facebook, Twitter ou Youtube,
explicando o seu funcionamento e fornecendo aos asistentes dos
coñecementos necesarios para levar a cabo “unha estratexia social
media eficiente”.
Trátase dun proxecto
co-financiado pola Rede Eusumo e a Xunta de Galicia do que xa se
realizou unha primeira edición en 2016. Esta primeira convocatoria,
engade a Fundación CEL, foi quen de acaparar un gran interese e
obtivo unha excelente resposta e resultados por parte dos
participantes.