A Fundación TIC clausura o curso 2016-17 da Escola de Imaxe e Son

Hoxe clausurouse oficialmente en Lugo o curso 2016-2017 da Escola de Imaxe e Son. No acto participaron o presidente da Fundación TIC e da Deputación Provincial, Darío Campos, a alcaldesa, Lara Méndez, e máis un nutrido grupo de convidados entre os que se contaban representantes dos medios de comunicación e das empresas e entidades ligadas ao audiovisual e aos contidos dixitais na nosa terra. Campos e Méndez felicitaron aos 28 novos titulados da EIS e aos alumnos de primeiro de Produción e Realización encargados de organizar e gravar a gala de graduación, para logo mostrala ao mundo nas redes sociais. Logo dos parabéns e dos mellores desexos para os 28 novos titulados, o presidente da entidade explicou que a formación que se imparte na EIS é “froito da aposta que facemos desde o Goberno da Deputación polo ensino de calidade, a igualdade de oportunidades e a especialización adaptada ás demandas dun sector moi dinámico”.
O presidente puxo como exemplos deste modelo educativo tanto a organización da propia gala como os traballos que se presentaron durante o acto: dous videoclips, unha curtametraxe e un spot, elaborados polos alumnos de segundo. Ademais, respecto do vindeiro ano académico, engadiu que o curso que vén manterase a matrícula de balde. A intención, dixo, é que “todas as mozas e mozos da provincia con talento e vocación poidan acceder a EIS, con indepenencia da súa situación económica”.
Os alumnos de primeiro de Produción organizaron a gala de graduación como práctica dentro do módulo de Planificación de Proxectos de Espectáculos e Eventos. Inspirada no cine clásico, a velada contou con numerosas sorpresas e un photocall na entrada da Escola.
Tal e como dixemos, proxectáronse audiovisuais feitos polos novos titulados: os video-clips Méteo no cu de Mi Perro Vicent e Tú sin mí de Lucía Pérez, a curtametraxe Hermetismos e o spot dunha marca de leite. Amais destes e outros traballos, o alumnado realizou tres programas de televisión que poden verse nas redes sociais e a Semana de Teatro con 11 espectáculos representados, producidos e realizados por eles.
No acto tamén se fixo saber que a matrícula para o curso 2017- 2018 será de balde por décimo ano consecutivo. O prazo de preinscrición para as 40 prazas de primeiro dos ciclos Superiores de Realización e Produción remata este venres, 23 de xuño. A matrícula ordinaria poderá formalizarse do 4 ao 20 de xullo.