A Fundación TIC renova a súa colaboración co Encontro de Torneiros de Xermade
xoves, 16 de agosto do 2018
A
Fundación TIC da Deputación de Lugo vai colaborar novamente coa
dezaoito edición do Encontro
Internacional de Torneiros de Xermade, que se celebra dende o 21
ata o 23 de setembro na devandita vila da Terra Chá. A
cita foi dada a coñecer os días pasados, nun acto no que
participaron o deputado de Turismo, Eduardo Vidal Baamonde, o alcalde
de Xermade, Roberto Castro, o torneiro Alfonso Franco, e a directora
xeral de Comercio, Sol Vázquez Areal.
Segundo
fixeron saber, o apoio da Funtación TIC forma parte da habitual
colaboración da Deputación de Lugo co encontro de torneiros, unha
oportunidade de primeira liña para coñecer os detalles desta
profesión tradicional a través de demostracións en vivo e un amplo
programa de actividades como charlas, conferencias e exhibicións.
Na
cita cos medios, celebrada na Biblioteca Municipal de Xermade, a
Deputación lembrou que a Fundación TIC ten editados varios vídeos
coas demostracións dos mestres que participaron en edicións
pasadas: Margarett Garrard, Jérôme Blanc, Adrián Pena e Manuel
Castro. Estes contidos, engadiu, están dispoñíbeis na canle de
YouTube da Fundación TIC e máis nas redes sociais onde a entidade
ten presenza, medios onde tamén é posíbel visualizar as reportaxes
e restantes traballos audiovisuais realizados nos últimos anos por
bolseiros e profesionais da TIC sobre este encontro internacional.
Con esta colaboración, a Fundación TIC quere contribuír a
“transmitir o labor dos mestres torneiros e manter vivo un oficio
tradicional con raizame na provincia de Lugo”.