A Hobbycon celebrarase na Coruña até o vindeiro domingo

Esta mañá abriu as súas portas Hobbycon, un encontro de lecer alternativo que se celebra no recinto de PALEXCO, e que xunta a afeccionados aos xogos de mesa, á animación xaponesa, ao cosplay, á música pop coreana e aos videoxogos, e durará até o vindeiro domingo.
Nesta cita coruñesa sempre tiveron un grande peso os videoxogos, tanto nas súas zonas de xogo libre como na celebración de diversos torneos, destacando nesta ocasión o peso que gañaron os xogos musicais, así como a fonte de inspiración que os videoxogos supoñen para os artistas que participan no evento e nos visitantes que optan por acudir caracterizados dos seus personaxes favoritos.
Aínda que os xogos musicais terán o seu espazo durante os 4 días que dura o evento, cómpre salientar que durante a tarde do venres celebrarase un torneo do xogo rítmico de realidade virtual Beat Saber, no que competirán os xogadores superando niveis baseados en música K-pop.
Entre as actividades da Hobbycon tamén podemos salientar un obradoiro que o venres ás 19:00 horas impartirá a psicóloga María Núñez Torreiro sobre como xestionar e conciliar as nosas relacións a través das redes e sobre a xestión emocional nos momentos de soidade e illamento.