A IA e o Big Data marcarán o rumbo da saúde pública galega en materia preditiva

A directora xeral de Saúde Publica, Carmen Durán Parrondo, compareceu na tarde deste xoves 15 de xuño no Parlamento de Galicia, na Comisión 5ª de Sanidade, Política Social e Emprego. Na súa intervención, salientou o papel protagonista que están a ter a Intelixencia Artificial e o Big Data (a análise da información a gran escala) na estratexia de dixitalización da Saúde Publica en Galicia. Durán Parrondo explicou algunhas das liñas de traballo nas que xa está a avanzar o departamento que dirixe, e nas que “o emprego das novas tecnoloxías terán un papel moi relevante”, dixo, xa que marcarán o rumbo da estratexia preditiva da saúde pública.
Apuntou que no eido da Intelixencia Artificial estanse a incorporar técnicas de aprendizaxe máquina (maching learning) e aprendizaxe profunda (deep learning) co ánimo de optimizar os diagnósticos dos cribados de cancro de mamá e colon. Tamén avanzou que xa se iniciaron dous proxectos vencellados aos cribados dos cancro de pulmón e de próstata, nos que, “por medio do emprego de algoritmos procurarase estratificar o risco que posúen os pacientes, para poder priorizar a realización de cribados mediante a información que se desprende destes datos”.
O obxectivo da Dirección Xeral neste proceso de dixitalización, dixo, “non é simplemente dispor dun rexistro ou dun sistema de información, senón ir un paso máis alá”, destacando que a Xunta “pretende avanzar nun modelo que ademais de contar o que xa ocorreu tamén advirta que é o que vai acontecer”.
Durán tamén adiantou que a Consellería de Sanidade empregará o Big Data nunha nova liña de traballo que pretende “establecer patróns que axuden tanto á vixilancia epidemiolóxica, como á identificación de factores que predispoñan a padecer unha enfermidade”.
Plataforma Sanidade Mediaverso
Amais, remarcou que a finais deste ano estará rematada a Plataforma Sanidade Mediaverso, un proxecto de contidos dixitais multitecnolóxicos que, inserido nos programas Obesidade Zero e Inspira Saúde, agrupará contidos relacionados cos estilos de vida saudábel. A plataforma, explicou, incorporará planificacións para levar a cabo unha alimentación equilibrada ou xogos de RealidadeAaumentada que promoveran o exercicio físico entre nenos e maiores. Entre estes últimos, destaca un aplicativo que permitirá trasladar os pasos diarios de cada usuario ás etapas do Camiño de Santiago (achegando información sobre os destinos que vaia acadando); e tamén unha aplicación a través de lentes de Realidade Virtual nas que as persoas maiores aprenderán a desenvolver un programa de actividade física multicompoñente, para a prevención da fraxilidade. Así mesmo, engadiu, Sanidade Metaverso completarase con contidos vencellados a hixiene do sono, o benestar emocional ou prevención de condutas aditivas entre a poboación moza.
Por outra banda, enxalzou o carácter senlleiro da Plataforma de Vixilancia Epidemiolóxica VIXIA (que agrupa a información relevante en canto a vixilancia dos servizos de microbioloxía clínica, medicina preventiva, centros socio-sanitarios e xefaturas territoriais); os sistemas de inspección de Saúde Pública, no que Galicia segue sendo pioneira, como o SEMAGA (sobre o control oficial en matadoiros), ou o HERME-MÓBIL (a ferramenta de inspección do sector alimentario e da sanidade ambiental).
Por último, destacou o desenvolvemento do Observatorio de Saúde Pública de Galicia, no que se realiza un investimento de máis de 700.000 euros, e “que avala a aposta decidida da Xunta de Galicia pola dixitalización, a comunicación coa cidadanía e a transparencia e que estará dispoñíbel a finais deste mesmo ano”. O Observatorio, apuntou, “é un instrumento que mediante información en Open Data, permite xerar, analizar, reunir, organizar e comunicar información relevante e de calidade no ámbito da saúde pública galega, co obxectivo de proporcionar información baseada na evidencia científica, e poñela ao dispor dos profesionais da saúde, investigadores, así como da sociedade en xeral”.