A IA será un dos motores da nova interface de Netflix

Netflix está a lanzar unha nova e mellorada experiencia para televisores a nivel mundial nas vindeiras semanas, cun deseño máis sinxelo e intuitivo, recomendacións máis adaptables en tempo real e un sistema de busca optimizado. A compañía tamén está a probar novas funcións móbiles, incluída unha busca que utiliza intelixencia artificial xenerativa e un feed vertical de clips. Estes cambios buscan facer máis doado para os subscritores atopar contido que lles guste no medio da crecente oferta de contidos de lecer.
Segundo Eunice Kim, directora de Produto, e Elizabeth Stone, directora de Tecnoloxía, a nova experiencia mantén a esencia da versión anterior, pero mellorada. O obxectivo principal é crear unha experiencia máis flexible para a ampla oferta de contido, máis intuitiva e adaptada ás necesidades dos usuarios, capaz de xerar momentos memorables. A directora de Produto, Eunice Kim, sinalou que esta non é a primeira modificación na páxina de inicio, pero que a combinación de nova tecnoloxía e a expansión da oferta de entretemento xustifican un salto de xigante.
Unha das principais novidades da interface de televisión é que agora é máis fácil atopar a mellor serie ou película, xa que toda a información necesaria para tomar unha decisión móstrase de forma destacada, no centro da pantalla. Isto permite aos subscritores prestar máis atención ao que fai relevante un título para eles, con etiquetas como Gañador do Premio Emmy ou 1º en series. Ademais, os accesos ás opcións principais do menú que actualmente están algo agochadas á esquerda pasarán a situarse na parte superior, gañando visibilidade.
As recomendacións na páxina de inicio tamén serán mellores e máis receptivas aos intereses do usuario no momento. Elizabeth Stone, directora de Tecnoloxía, explicou que, ademais do uso tradicional de aprendizaxe automática para suxerir títulos baseándose no historial de visualización, as novas recomendacións terán en conta máis sinais, como os tráilers que se ven ou as buscas que se realizan, para adaptar a páxina de inicio e suxerir contido máis axeitado no momento. Esta adaptación ocorrerá de xeito fluído e discreto para o usuario.
No ámbito dos dispositivos móbiles, Netflix está a explorar novas formas de descubrimento. Estase a probar, en fase beta en iOS, unha función opcional que incorpora a intelixencia artificial xenerativa ao proceso de busca, permitindo aos subscritores atopar series e películas usando linguaxe natural e conversacional, como por exemplo: «Quero ver algo divertido e con bo rollo». Nas vindeiras semanas, tamén se probará un feed vertical que mostrará clips de series e películas de Netflix, facilitando e facendo máis divertida a descuberta de títulos. Os usuarios poderán tocar a pantalla para ver o contido completo de inmediato, engadilo á súa lista ou compartilo con amigos.
Netflix considera que a súa superpotencia é a capacidade de combinar a mellor tecnoloxía co mellor entretemento. Tecnoloxías como a IA son clave, non só para as recomendacións e a busca xenerativa, senón tamén para personalizar a información sobre cada título e mellorar a entrega de contido.
Comentan que fan uso de Open Connect, unha rede propia que almacena arquivos de vídeo preto dos fogares dos usuarios para reducir o tráfico de Internet e o tempo de espera ao premer play. Esta rede, iniciada en 2012, incorporou capacidades de IA para optimizar o fluxo de datos, a calidade de transmisión e a compresión de vídeo, e serve como base para entregar unha variedade máis ampla de contido, incluídos eventos en directo e xogos.
Elizabeth Stone concluíu que o máis emocionante é como esta nova experiencia permitirá a Netflix evolucionar e innovar máis facilmente no futuro, conectando ao público con aínda máis series, películas e xogos que lles encantarán.