A III Olimpíada Galega de Historia adopta o formato virtual
luns, 6 de abril do 2020
A
terceira edición da Olimpíada
Galega de Historia que estaba prevista para o vindeiro 22 de maio no
Campus de Ourense vaise celebrar, por mor da actual crise sanitaria e
co obxectivo de garantir as mellores medidas de control e protección,
en formato virtual. Así o vén de confirmar a Facultade de
Historia, organizadora do evento, sinalando que “debido ao actual
contexto educativo derivado da loita contra a COVID-19, anulouse a
celebración presencial da olimpíada e apostouse pola súa
realización virtual”, lanzando un novo proxecto que adapta a
actividade para ser desenvolvida dende os fogares dos participantes,
“en consonancia co que se está realizando na Universidade de
Vigo”.
Este
proxecto retoma boa parte dos fitos acadados na anterior edición,
que se desenvolveu en parte a través da plataforma Kahoot, agás na
fase final do certame.
Na
III Olimpíada Galega de Historia, que ten un formato de
pregunta-resposta, pode participar o alumnado matriculado no curso
2019/2020 en cuarto curso de Educación Secundaria Obrigatoria ou
Educación Secundaria de Adultos dos centros de Ensino Secundario de
Galicia. Segundo informa a organización, mantense o formato previsto
na convocatoria de catro estudantes por equipo que estarían
conectados entre si por Rede, asumindo un deles a tarefa de
coordinación en conexión coa organización a través dunha aula do
Campus Remoto da Universidade de Vigo.
