A IV edición do Congreso XoveTIC congregou a máis dun centenar de asistentes
venres, 22 de outubro do 2021
O Congreso
XoveTIC, organizado polo Centro de Investigación TIC (CITIC) da
Universidade da Coruña, celebrou este mes de outubro a súa cuarta
edición, que congregou a máis dun centenar de asistentes en
formato híbrido. Investigadores e investigadoras júnior presentaron
un total de 62 traballos no ámbito das Tecnoloxías da Información
e as Comunicacións, sendo un espazo de encontro para o debate
científico e un impulso para a súa formación.
Ademais das comunicacións orais e os pósteres
presentados, celebráronse
dúas conferencias plenarias, a cargo da directora da Área de
Tecnoloxía da UPF Barcelona School of Management, Ana Freire, que
explicou coa súa charla Tecnoloxía
deseñada por e para o ser humano como
se pode aplicar a tecnoloxía na saúde mental e axudar na prevención
do suicidio. O membro
do Comité Asesor de Directores do INESC TEC de Porto e profesor da
Universidade do Minho, Rui Carlos Oliveira, ofreceu o
seu relatorio
Emergency Research: Help fighting a pandemic,
achegando o traballo realizado coa aplicación Stayaway
COVID.
O reitor da Universidade da Coruña, Julio Abalde,
e o director do CITIC, Manuel F. González Penedo, clausuraron o acto
tras a entrega de premios, na que se recoñeceron os mellores
traballos valorados por parte do comité científico do XoveTIC,
atendendo á súa calidade, excelencia e orixinalidade. Cada premio
estivo dotado cunha gratificación económica de 300 euros.
Os traballos premiados foron:
— SparkEC: una herramienta Big Data para la
corrección de errores en lecturas genética,
presentado por Marco Martínez Sánchez. Entregou o premio en
representación do Clúster
TIC de Galicia o director xeral de Imatia, Fernando Vázquez.
— Multiple-Choice Question Answering Models
for Automatic Depression Severity Estimation,
recollido por Anxo Pérez, coautor do traballo, en representación
de Jorge Gabín, quen realizou a exposición. Entregou o premio o
presidente do Colexio Profesional de Enxeñaría en Informática de
Galicia (CPEIG), Fernando Suárez Lorenzo.
— Detección de ataques de DoS en un entorno
IoT controlado por protocolo MQTT basado en clasificadores binarios
inteligentes, presentado por
Álvaro Michelena. O recoñecemento foi realizado por parte do
director da área IT e Enxeñería de Software do Instituto
Tecnolóxico de Galicia (ITG), Óscar González Represas.
— Collaborative Digital Twin: a Novel
Open-Source Augmented Reality Solution for Training and Maintenance
Processes in the Shipyard of the Future,
exposto por Aida Vidal Balea, e galardoado pola Cátedra Aldaba WIB,
a Cátedra UDC-Everis en Transformación Dixital e a Cátedra R en
Ciberseguridade; entregou o premio o decano da Facultade de
Informática da UDC, Mariano Cabrero Canosa.
— Practicum Direct
Simulador para la toma de decisiones durante pandemias,
exposición realizada por Alejandro Puente e premiada pola Fundación
CITIC de Galicia (FCITICG). Acudiu en representación do Concello da
Coruña, membro do padroado da FCITICG, o concelleiro de Educación,
Memoria Histórica, Innovación, Industria e Emprego do Concello da
Coruña, Jesús Javier Celemín Santos.