A Industria 4.0, ao detalle os vindeiros 9 e 10 de maio nas sedes de GAIN e CIS Galicia
martes, 26 de abril do 2016
Os días 9 e 10 de maio
vaise celebrar na nosa terra o Multi-Foro
Industria 4.0, un evento que ten o obxectivo de facilitar a
adaptación das empresas industriais ás tecnoloxías da Industria
4.0, en palabras dos organizadores do encontro “tecnoloxías que
están a configurar unha nova realidade industrial a escala global”.
A cita contará con representantes dos gobernos galego e estatal,
presentando os detalles da folla de ruta da Industria 4.0 para
ámbalas administracións. Entre outros, participarán o presidente
da Xunta, o ministro de Industria e directivos das empresas Indra,
Telefónica, Navantia ou Grupo PSA. Tamén achegarán relatorios a
Axencia Galega de Innovación (GAIN), o Centro de Supercomputación
de Galicia (CESGA), o Centro Tecnolóxico Gradiant, EnergyLab ou a
axencia AMTEGA.
Os representantes das
devanditas entidades analizarán as tecnoloxías clave do que se
coñece como Industria 4.0. Farano en catro foros temáticos, que se
desenvolverán durante os días 9 e 10 de maio nas sedes de GAIN en
Santiago e en Ferrol (CIS Galicia). De maneira paralela, habilitarase
unha sala de exhibición onde os asistentes poderán coñecer o
primeiro prototipo galego de coche autónomo e de UAV (Vehículo
Aéreo non Tripulado), ver como funciona un robot colaborativo,
presenciar un proceso de deseño 3D e fabricación dixital, coñecer
tecnoloxías de impresión 3D (bioimpresión) ou probar novos
dispositivos de realidade virtual que se lanzarán ao mercado en
2016. Por temáticas, estas serán as principais no Multi-Foro:
nanotecnoloxía, robótica, fabricación aditiva, impresión en 3D,
bioimpresión, realidade virtual, realidade aumentada, simuladores,
computación, UAV ou drons.