A Mostra de Encaixe de Camariñas acolle un novo encontro blogueiro
martes, 22 de marzo do 2016
Mañá comeza na vila de Camariñas a
edición número 26 da súa Mostra de Encaixe e, como en
anteriores entregas, haberá unha vertente adicada a ese espazo onde
se mesturan a moda, o téxtil e as tendencias ca comunicación
dixital. Deste xeito, e á maneira dunha actividade complementaria,
celebrarase no segundo día de actividades (o xoves 24) un
encontro blogueiro no que xa confirmaron a súa participación oito
comunicadoras web centradas no eido da moda. Serán cinco mozas e
tres mozos e as súas intervencións darán comezo arredor das 14
horas no recinto feiral.
Segundo a organización (o Concello de Camariñas),
trátase de blogueiras que, a través dos seus respectivos cadernos,
son unha “referencia” dentro da comunicación de tendencias. As
participantes son Yolanda Álvarez, creadora de Nosinmiyoli.com;
Fátima García, responsábel de Fashionomy.com;
Ra Dosil, de Mysweetpeque.com;
Raquel Gamallo, de Mividaentretelas.com;
Rubén Alexandre, de Surviveinvogue.com;
Andy González, de Yourfashionmoment.com;
Diego Moledo, de Dmrvstyle.com
e Nerea Calvo, de Misseverydaybyneriblog.com.
A edición 2016 da Mostra de Encaixe celébrase
entre o 23 e o 27 de marzo e contará cun total de 52 puntos de
exhibición. O obxectivo fundamental: amosar e impulsar o labor que
despregan cada ano, no mundo téxtil e botando man das técnicas
tradicionais da Costa da Morte, máis dun milleiro de mulleres.