A Nintendo 3DS supera os 22 millóns de unidades vendidas

mércores, 21 de novembro do 2012 Marcus Fernández

Aínda que os comezos da Nintendo 3DS foron un tanto difíciles por mor do seu elevado prezo de saída e o reducido catálogo de xogo, unha vez que rebaixou o seu prezo e recibiu títulos da grandes franquías de Nintendo (como Mario e Zelda) as cousas mudaron drasticamente, e agora publican que entre a Nintendo 3DS e 3DS XL venderon preto de 6 millóns de unidades nos EE.UU. e máis de 22 millóns de unidades a nivel global a data do 30 de setembro, o que veu acompañado pola venda de 64,45 millóns de xogos, cantidades moi significativas, que deixan quedar moi mal parada á consola portátil de Sony, a PS Vita, que a nivel mundial apenas tería colocado 3,2 millóns de unidades.
Nintendo amosa estes números no momento que anuncia que o vindeiro venres, coñecido como Black Friday nos EE.UU., vai por á venda no mercado americano un novo paquete que inclúe unha Nintendo 3DS de cor vermello co xogo Super Mario 3D Land preinstalado, ou sexa, que o xogo incluiríase de balde no lote que agardamos que chegue a Europa de cara á campaña de Nadal.

O modelo vermello de Nintendo 3DS vai incluír de balde nos EE.UU. o xogo Super Mario 3D Land

PUBLICIDADE