A Oficina de Software Libre de Ames móstranos este sábado como converternos en reparadores tecnolóxicos

mércores, 18 de outubro do 2023 S. P.

Este sábado, 21 de outubro celébrase unha nova actividade da Oficina de Voluntariado Informático de Software Libre de Ames, unha iniciativa impulsada por AGASOL coa colaboración da Concellaría de Benestar Social do Concello. A Oficina de Software Libre e Banco de Reciclaxe Electrónica de Ames é un proxecto posto en marcha polo Concello de Ames e a Asociación de Empresas Galegas de Software Libre (AGASOL). Desta volta, impartirase o obradoiro Repair café de equipos informáticos, con motivo da celebración do Día Internacional da Reparación.
“Coa elección deste tema”, explican dende a Oficina, “búscase salientar que non só os reparadores profesionais deben ter acceso á información de reparación”. Así, engaden, o voluntariado dos Repair Cafés e os consumidores comúns “tamén deben poder beneficiarse deste apoio”, con arranxos asumíbeis e accesíbeis, do mesmo xeito que as pezas de reposto, que “tamén deben estar amplamente dispoñíbeis e entregarse rapidamente cando se necesiten. En base a isto, axudarase aos participantes a reparar os seus propios equipos.
A inscrición pódese realizar premendo na ligazón específica habilitada. A actividade impartirase no local que está situado no antigo centro de saúde do Milladoiro, na rúa Agro do Medio, número 8, de 11:00 a 13:00 horas.
Divulgación das novas tecnoloxías en software libre
Cómpre lembrar que a Oficina de Software Libre centra as súas actividades en divulgar as novas tecnoloxías en programas abertos entre os grupos sociais menos favorecidos. Para conseguilo, impártense cursos de formación e realízanse actividades de alfabetización dixital para aquelas persoas que o necesiten. Ademais, ofrécese axuda para resolver dúbidas relacionadas coa tecnoloxía e establécese como punto de encontro onde aprender, compartir e construír.
As actividades do presente curso comezaron o pasado 16 de setembro co obradoiro Aforra na túa factura da luz. Durante o pasado curso a Oficina desenvolveu catro actividades de formación e divulgación de tecnoloxías de software libre. En concreto, realizou dous obradoiros sobre a posta a punto, reciclaxe e instalación de computadores, outro sobre a seguridade dixital básica e un obradoiro de iniciación á reparación e reciclaxe de altofalantes.

PUBLICIDADE