A PlayStation 5 supera os 40 millóns de consolas vendidas

En febreiro comentamos que o parque de consolas PlayStation 5 chegara aos 32,1 millóns, e o ritmo de compras da consola doméstica de Sony continúa firma, de xeito que agora erguen a cabeza para celebrar que superaron os 40 millóns de PS5 vendidas.
Conseguir este volume de consolas vendidas ten bastante mérito, xa que débese principalmente ás vendas máis recentes, pois tras o lanzamento da PlayStation 5 houbo un importante desabastecemento que non foron quen de solucionar ao ser consecuencia de varias crises simultáneas (pois tanto había problemas para conseguir certos compoñentes, tiñan que afrontar as dificultades de traballar nas condicións sanitarias impostas pola pandemia e tamén houbo limitacións no transporte a escala global).
Dende Sony están moi satisfeitos polo bo funcionamento comercial das consolas, pero tamén dos accesorios, xa que os mandos sen fíos DualSense están a venderse moi ben nas súas distintas cores, e incluso está a haber bastante demanda das cubertas de cores para a PS5, deixando claro que os xogadores queren dar o seu propio estilo á súa consola doméstica.
Aínda que a consola xa contou con varios redeseños a nivel interno, queda agora agardar a que se presenten as súas revisións, que poderían comezar a saír este mesmo ano, e que coméntase que podería ser inicialmente unha versión máis compacta con unidade óptica opcional, para máis adiante deixar a porta aberta a unha versión Pro, seguindo así os pasos seguidos pola PS4, e facilitando así que a actual xeración de consolas dure máis anos con dignidade.