A Policía de Santiago poderá reconstruír sinistros en 3D

A Policía local de Santiago conta cunha nova ferramenta para a investigación de sinistros viarios, permitindo a investigación e reconstrución de accidentes. Trátase dun programa informático de simulación dinámica que se vén de poñer a disposición da axentes da Sección de Atestados grazas á colaboración entre departamentos municipais (Persoal, Informática e a Policía Local).
A ferramenta, segundo informou o Concello, “axúdase das principais leis da física para efectuar precisos modelos de cálculo, entre eles un modelo de colisión de impulso-movemento, un modelo de impacto baseado nos coeficientes de rixidez, un modelo cinético de simulación de traxectorias e un modelo cinemático para estudos de tempo-distancia”.
Por outra banda, permitirá realizar, de xeito automático, cálculos da colisión en 2D e 3D. Farao tendo en conta o grao de enerxía absorbida nas deformacións dos vehículos e “outros factores reais” cuxo cómputo era moi complexo de abordar por razóns de recursos despregados e tempo. O Concello engadiu que “a animación tridimensional achegará unha didáctica moi necesaria para a interpretación e reprodución dos feitos, proporcionando máis información que calquera outro medio ao permitir analizar os detalles dunha escena complexa visualmente”.
O programa permitirá, tanto a realización de esbozo en 2D e 3D, incluíndo, nos 3D, animacións dinámicas. Ao mesmo tempo, fará posible a medición de distancias por medio de fotografías e a avaliación de deformacións en carrocerías de vehículos para calcular velocidades relativas ou posicións finais. Outra funcionalidade que pon en xogo son as simulacións en 3D que mostran as diferentes perspectivas de testemuñas, vítimas ou condutores.