A Rede réndelle homenaxe á creatividade
mércores, 23 de maio do 2012
- Homenaxe de Google a Robert Moog
A
vida dáche sorpresas... sorpresas dáche a vida; sorpresas como a que nos
atopamos hoxe pola mañá ao abrir o buscador de
Google, onde lle podiamos dar renda solta á nosa creatividade e montar
pezas musicais ao noso gusto, nun peculiar sintetizador que o xigante americano
deseñou para renderlle homenaxe ao seu creador, Robert Moog.
Ou
sorpresas como a que atopamos un intre máis tarde na Rede, rebuscando entre tódolos
blogs habidos e por haber á procura de
xente creativa da talla do creador de Mario Bros, Shigeru Miyamoto, por citar
un, que tamén para sorpresa de moitos será galardoado co Premio Príncipe
de Asturias de Comunicación e Humanidades 2012.
- Creación da ilustradora galega Marta Álvarez
Ó
que imos, que a estas dúas sorpresas iniciais temos que engadirlle a do achado
do blog dunha ilustradora galega
que desborda talento polos catro costados, da que nos poden soar algunhas
creacións, sobre todo se temos fillos pequenos na casa, pois ten realizado
traballos para as editoriais Santillana, Oxford University press, Alfaguara,
Obradoiro ou Galaxia, entre outras moitas, nas súas edicións de literatura e libros de texto infantís.
Falamos
de Marta Álvarez, unha galega afincada en Santiago de Compostela, que non aforra
unha miga de creatividade cando se trata de ilustrar para os máis cativos da
casa, e de facer que a súa imaxinación (a estrear) chegue tan lonxe como chega
a dela na escolla das cores e das formas para a súas ilustracións.
Dunha
maneira maxistral que domina como ninguén, esta artista mestura o seu talento
natural coa perfección que lle aportan as ferramentas tecnolóxicas, e o
resultado salta á vista no seu portfolio: é inmellorable.
Dende
logo, a partir de agora, nós persoalmente poremos máis atención no traballo que
hai detrás de cada ilustración que agocha cada libro que nos pasa polas mans, e
que a ben seguro, se a lectura pide renderlle unha homenaxe á creatividade, as
ilustracións non serán para menos, sobre todo se veñen da man desta artista
como a copa dun pino.