A Sala Nasa envorcará na rede 600 horas de gravacións dos seus espectáculos

18 anos de Sala Nasa dan para moito. Con todo, tendo en conta que neste escenario en concreto nunca debeu ficar nada pendente por dicir, case semella un proceso natural que a sala bote abaixo os seus límites físicos no bairro compostelán de San Lourenzo e se decida a envorcar na Internet todo o rexistrado audiovisualmente nese tempo. Así nolo contou esta semana Xesús Ron, comandante da Sala, quen nunha completa reportaxe de Xornal como identifica a posta en marcha deste proxecto tecnolóxico-audiovisual cun retrato das artes escénicas galegas das últimas décadas tan bo coma calquera outro. A iniciativa, como é de agardar, non vén soa. Acompáñase da televisión-web redenasa.tv, proposta en liña que dá acubillo a estes contidos e que vén de comezar a súa andaina. O comezo non é un comezo calquera: ofreceralle á comunidade internauta seiscentas horas de gravacións de todo tipo de actividades desenvolvidas na sala: música, arte ou teatro.
O froito de todo isto está nas moitas cintas de VHS e mini-dv que se tiñan gardadas no almacén e que logo dun proceso de recuperación e dixitalización (no que foi preciso desbotar ata un 15% do gravado, por estar as cintas en mal estado), irá envorcándose devagar pero sen pausa na devandita páxina web.
A xuízo dos responsables, o arquivo non se vai pór na Rede de golpe nin será un museo, pero si un espazo “vivo” que se manteña aberto á participación. De feito, a web vai dirixida a ofrecerse tamén coma unha rede social, onde os usuarios e usuarias poderán achegar as súas imaxes ou vídeos ou subministrar comentarios e consellos sobre aquel espectáculo ou obra que non se pode deixar de ver.
Entre o máis salientable do agora recuperado, por citar algúns exemplos arestora de actualidade, atópase a primeira visita á nosa terra dos míticos Mano Negra, o grupo liderado por Manu Chao, ou os comezos escénicos do galego Luís Tosar. Por certo que detrás da iniciativa de desenvolvemento en liña e deseño atópase a empresa galega A Navalla Suíza, da que falamos recentemente nesta web para dar conta dun importante premio obtido na cidade francesa (que non a galega) de Cannes. A nova achega da Nasa únese á páxina oficial da sala, dispoñible dende hai anos como un caderno de bitácora no que se veñen dando conta polo miúdo de quen actúa, cando e en que circunstancias.