A Sony Alpha 7 IV disparará fotografías a 33 Mpíxeles e gravará vídeo en 4K/60p

Esta semana Sony estrea unha das súas reputadas cámaras sen espello de fotograma completo con obxectivos intercambiables, a Sony Alpha 7 IV (ILCE-7M4), que conta cun sensor de imaxe de 33 Mpíxeles, que xunto ao motor de procesamento de imaxe BIONZ XR e o enfoque automático avanzado propio desta familia de cámaras consegue magníficas imaxes e vídeos, ao que habería que sumar as posibilidades de conectividade para atender ás demandas dos usuarios actuais.
A nova Alpha 7 IV pode disparar até 10 imaxes por segundo, así como gravar vídeo en 4K a 60 imaxes por segundo, apostando sempre pola calidade, de xeito que non se limita a unha grande resolución de imaxe, senón que tamén coida a reprodución de cor para conseguir unha maior fidelidade e cores máis naturais, presumindo tamén de imaxes con pouco ruído no rango de ISO estándar 100-51.200 e ofrecendo tamén un rango dinámico completo de 15 pasos. As imaxes, en vez de gardalas en RAW e JPEG, tamén poden almacenarse en HEIF de 10 bits, un formato de alta eficiencia que mantén gradacións suaves.
No que respecta ao enfoque, a nova cámara conta cun enfoque automático híbrido rápido mellorado (con 759 puntos de enfoque automático con detección de fases); fai uso da intelixencia artificial para poder realizar o seguimento de ollos e caras e así realizar un seguimento de suxeitos para que saian sempre enfocados; o enfoque aos ollos tamén pode aplicarse a mascotas e incluso conta con preaxustes para fotografar aves.
No apartado do vídeo pode gravar en 4K a 60 imaxes por segundo cun acabado natural grazas ao amplo rango dinámico; ao gravar vídeo a 30 imaxes por segundo en 4K a cámara toma mostras en 7K, polo que consegue así unhas imaxes máis detalladas; o vídeo rexístrase en 4:2:2 de 10 bits (para evitar a perda de información de cor no seu postprocesado); permite gravar os fotogramas por separado (All-intra) até a 600 Mbps; co formato de gravación XAVC-HS consegue gravar con calidade mantendo un tamaño reducido de ficheiros; permite facer uso de S-Cinetone, Look creativo e S-Log3 para conseguir películas expresivas; a estabilización de imaxe da cámara tamén pode aproveitarse para gravar vídeos cámara en man; e incluso conta cunha interface de audio dixital para poder captar son de alta calidade nas gravacións de vídeo.
Atendendo ás demandas dos creadores de contidos e do público en xeral, a Sony Alpha 7 IV pode conectarse directamente a un ordenador ou smarphone a través de USB para operar a xeito de webcam, sendo posible así retransmitir vídeo en directo en 4K ou Full HD. Tamén conta con funcións de comunicación sen fíos para transferir as imaxes captadas ao móbil ou a un servidor FTP remoto.
Outros detalles salientables desta nova cámara sería que está equipada cun visor OLED Quad-VGA de 3,68 Mpíxeles e que o seu panel táctil LCD de 1,03 Mpíxeles ten ángulo variable e apertura lateral, polo que estamos ante unha cámara bastante versátil.
Está previsto que chegue ao mercado no mes de decembro a un prezo aproximado de 2.500 dólares (só o corpo) ou a 2.700 dólares (cun obxectivo Sony FE 28-70mm F3.5-5.6 OSS).