A Tecnópole acolle o lanzamento de Energytic.eu cunha xornada formativa
mércores, 4 de maio do 2011
No
marco do proxecto europeo ER-INNOVA, deseñado para incrementar a
competitividade das pequenas e medianas empresas do sector das enerxías
renovables a través das TIC, o Parque Tecnolóxico de Galicia –Tecnópole– vai acoller,
este venres 6 de maio, o lanzamento dunha plataforma online coa que darlle servizo ás pequenas e medianas empresas do
sector de toda Galicia e do Norte de Portugal.
Trátase
da web Energytic.eu, que está a ser promovida
na Rede polos socios de ER-INNOVA, a fin de “dinamizar a cooperación entre as empresas do sector das renovables para
levar a cabo proxectos conxuntos de innovación”. Asemade, Energytic permite
a implantación, por parte das empresas interesadas, de comercio online e da facturación electrónica.
Neste
senso, a Tecnópole vai organizar unha xornada técnica á que van asistir as
PEMES que participan na fase piloto do proxecto, porén tamén estará aberta a
todas aquelas empresas, centros tecnolóxicos, asociacións e demais axentes do
sector galego interesados no manexo destas ferramentas tecnolóxicas. A
intención é, segundo informan dende a Tecnópole, “facelas extensivas a todo o sector”.
Nesta
xornada, de carácter eminentemente práctico, explicarase o funcionamento da
web, na que, entre outras cousas, se achega información actualizada sobre as
convocatorias de financiación específicas para o sector e se permite a procura
de socios para determinados proxectos.
Tamén
inclúe un mercado virtual de intercambio de bens e servizos, así como un
completo sistema de facturación electrónica a disposición das empresas rexistradas.
A
posta en marcha desta plataforma compleméntase coa outra liña principal de
actuación do proxecto: o deseño e implantación de ferramentas para a xestión
interna das PEMES a través de aplicacións de escritorio, entre as que as
destaca un sistema de planifificación de recursos empresariais (ERP)
especificamente deseñado para elas.
Esta
ferramenta xa está a ser implantada nas empresas participantes, porén a partir
do venres, estará a disposición na web er-innova.com para a súa descarga de
balde por parte de calquera entidade interesada.
Entre
os socios do proxecto destacan, ademais da Tecnópole, a Asociación de Empresas
Galegas adicadas a Internet e ás Novas Tecnoloxías (EGANET) e a Fundación para
o Fomento da Calidade Industrial e o Desenvolvemento Tecnolóxico de Galicia, a
través de OPIDi.