A UCGAL lembra que as avarías e a súa xestión marcan a diferenza entre operadoras na banda larga fixa

A Unión de Consumidores de Galicia colaborou coa Asociación de Internautas para examinar a calidade da banda larga en España en 2025, servíndose para iso dos datos oficiais da Secretaría de Estado de Telecomunicacións e Infraestruturas Dixitais, da Oficina de Atención ao Usuario de Telecomunicacións (OAUT) e das súas propias avaliacións sobre as velocidades de transmisión (case 8 millóns) en fixo e móbil realizadas por 40 panelistas.
En calidade global, como media das puntuacións en Banda Larga Fixa (BLF) e Móbil (BLM), Movistar colócase á cabeza da clasificación con case 8 puntos, e Vodafone ao final sen chegar aos 6. Con maior ou menor marxe, o resto das operadoras percorren a franxa dos 6 puntos.
O estudo revela que as avarías e os factores ligados á súa xestión “marcan as diferenzas na BLF”, mentres que “as velocidades de descarga e subida son relevantes na BLM… pero pouco”.
Na investigación asegúrase que Movistar presenta unha baixa porcentaxe de avarías (0,20%) fronte a Orange, MásMóvil e Digi, que superan o 1,5%, mentres R e Telecable achéganse ao 3,30%. Os peores: Vodafone (4,46%) e Euskaltel (4,20%).
No capítulo de tempo de resolución das incidencias, indícase que “fronte ás 46 horas de Movistar, o resto das operadoras van desde as 120 horas (5 días) de Digi, ata máis de 160 horas (case 7 días) de Orange, R e Telecable. Vodafone e Euskaltel achéganse ás 150 horas (case 6 días)”.
En canto á porcentaxe de avarías reparadas, Movistar supera o 99%, o resto das operadoras oscila entre o 77% e o 79%, agás Vodafone (case 81%) e Digi, que se achega ao 68%.
No que respecta ás velocidades, as medas de descarga e subida na BLF sitúanse por riba do 95%. En baixada rexístranse caudais medios desde o 96% (MásMóvil) ata o 101% de Orange e Movistar; o resto supera o 98%. En subida, o rango vai desde o 96% de MásMóvil ata o 99% de Orange.
Na BLM, “o caudal medio de descarga sobre a oferta de 150 Mb vai desde o 51% de Orange ata o 53,46% de MásMóvil, é dicir, unha diferenza moi leve, e na subida si se aprecia unha diferenza maior, como reflicten os datos de Movistar (82%), Orange (81%) e Vodafone (74%)”, sinálase no estudo.
Os servizos converxentes, segundo a CNMC, representan o 97% das liñas fixas e o 90% das liñas móbiles de pospago. Por iso, explícanse, “concentran a maior parte das reclamacións das persoas usuarias ante a OAUT”. Neste capítulo, o mellor comportamento corresponde a Digi con 0,26 por cada 10.000 persoas usuarias. No extremo contrario, Vodafone con 2,96. As operadoras baixo a órbita da fusión MásMóvil e Orange (estas e Euskaltel, R eTelecable) sitúanse en 1,38. Por último, Movistar rexistra 1,15.
En atención ao cliente, as queixas das persoas usuarias sitúan a R como a mellor operadora cun volume de 0,021 por cada 10.000 abonados/as. Por debaixo do 0,1 atópanse Digi, Euskaltel, Orange e Movistar. Vodafone presenta un volume de 0,13 e MásMóvil de 0,15 por cada 10.000 abonados/as.
Conclusións do estudo
-“É preciso seguir realizando os maiores esforzos para manter a fiabilidade das redes e, en consecuencia, conter as porcentaxes de avarías, especialmente naquelas operadoras que superan o 1%”.
-“O carácter esencial das redes require tempos de reparación prudentes; superar os 5 días ou achegarse aos 7 supón afondar na incomunicación”.
-“Quedar por debaixo do 90% ou non acadar o 95% das reparacións realizadas no tempo comprometido supón un servizo deficiente ou mal dimensionado”.
-“As reclamacións poñen de manifesto que é preciso mellorar a primeira liña de atención ás persoas clientes, que reside nas propias empresas. As avarías e a súa mala xestión incrementan a insatisfacción da clientela e socavan a defensa dos seus dereitos”.
-“As medicións de velocidade que revelan os caudais de descarga e subida non amosan grandes diferenzas na BLF, sendo algo máis acusadas na BLM, aínda que neste caso a limitación é que os caudais son escasos en relación coas velocidades ofertadas”.
-“As auténticas prioridades da dixitalización son: promover o acceso ás conexións de rede por parte das persoas usuarias e o acceso aos dispositivos necesarios, e incrementar a formación e o coñecemento no uso da tecnoloxía”.
-“Ademais, o mantemento das infraestruturas require unha contribución equilibrada de todos os axentes, incluídas as grandes plataformas dixitais que fan un uso intensivo das redes, baixo o risco de poñer en perigo a súa sustentabilidade e, polo tanto, a calidade da experiencia de todas as persoas usuarias”.
-“Por outra banda, co obxectivo de avanzar na cohesión social e territorial, é necesario promover a plena conectividade de alta velocidade, actualmente representada polas tecnoloxías de fibra óptica e 5G en todo o territorio, incluídos os municipios de menor tamaño. Neste sentido, a Asociación de Internautas (AI) considera crucial impulsar e incentivar os mecanismos de colaboración público-privada para universalizar o acceso á conectividade e cumprir os obxectivos do Plan España Dixital 2026”.