A UDC acolleu unha xornada sobre violencia de xénero, comunicación audiovisual e videoxogos

A subdelegada do Goberno na Coruña, María Rivas, e a directora da Oficina de Igualdade de Xénero da UDC, Ana Neira, inauguraron este luns 27 de novembro a xornada Comunicación e Violencia de Xénero, na Facultade de Ciencias de Comunicación da UDC, dirixida a alumnas e alumnos do grado de Comunicación Audiovisual. Logo do acto inaugural da xornada, organizada pola Subdelegación e a UDC, celebrouse un relatorio a cargo de Isabel Bértolo sobre O Rol da Muller na Animación, ex alumna da facultade, que decidiu especializarse na animación en 3D e que participou en películas como Wonder Park, Paddington 2, Mowgli, Christopher Robin, Tadeo Jones 3 ou a saga X – men; e tamén en Blue and Malone, gañadora dun Goya á mellor curtametraxe de animación.
Isabel Bértolo compartiu os micromachismos máis frecuentes que viven as mulleres no mundo da animación: mansplaining, hepeating, maninterrupting e a desvalorización do traballo da muller. Neste senso amosou datos e estatísticas relacionadas co sector da animación 3D en España e a produción audiovisual, que manifestan que “a pesar de haber máis alumnas no sector non hai igualdade de oportunidades”.
Posteriormente desenvolveuse unha mesa redonda, que foi conducida por Teresa Piñeiro, directora do Centro de Estudos de Xénero e Feministas (CEXEF), na que as participantes quixeron poñer o acento, cada unha dende o seu espazo de referencia, sobre como as mulleres se ven reflectidas nos distintos medios e soportes comunicativos, facendo especial mención ao tratamento informativo – comunicativo da violencia de xénero.
Así a fotoxornalista Vanessa Casteleiro salientou a necesidade de representar a historia das mulleres xa que “non esta escrita nin por mulleres nin para mulleres”, polo que é imprescindíbel un traballo de entender, difundir e escoitar. Tamén recalcou que o fenómeno social de alta presencia en medios está reservado para os crimes machistas máis morbosos, caendo no sensacionalismo, e mentres que das mulleres vítimas se comparte toda a súa información persoal, dos perpetradores non se sabe nada.
Pola súa banda Priscila Retamozo, creadora de contidos e produtora de programas en diverso formato (radio e vídeo) explicou como o ascenso dos discursos negacionistas recalca a necesidade da formación con perspectiva de xénero e que “non se pode comunicar de forma correcta e verídica invisibilizando á metade da poboación”.
Finalmente a Presidenta da Asociación Mirabal, Ana Saavedra, en representación das asociacións de mulleres vítimas de violencia de xénero falou dos cambios mais significativos no ámbito da violencia de xénero dende a creación da asociación, e de como a comunicación arredor da violencia machista.
Esta xornada é unha actividade máis das desenvolvidas dende a Subdelegación do Goberno na Coruña con motivo do 25N, Día Internacional da Eliminación da Violencia contra as Mulleres. Ao igual que a campaña desenvolvida en redes sociais durante toda a semana pasada, a Subdelegación do Goberno quixo centrar ás mensaxes en achegarse á xente nova, e neste caso, as mozas e mozos da universidade.