A UDC e a Cámara da Coruña traballarán polo impulso tecnolóxico da cidade e a súa contorna

xoves, 19 de maio do 2022 S. P.

A UDC e a Cámara de Comercio da Coruña uniron forzas para impulsar a capacidade de transformación, innovación e desenvolvemento tecnolóxico e industrial da cidade e a súa área de influencia. Así o fixeron saber na mañá deste xoves 19 de maio o reitor da Universidade da Coruña, Julio Abalde, e o presidente da Fundación da Oficina de Promoción Tecnolóxico-Industrial da Cámara de Comercio da Coruña, Antonio Couceiro. Abalde e Couceiro asinaron un acordo na Reitoría a través do cal a UDC pasa a integrarse no padroado da dita fundación.
En virtude desta alianza, o reitor súmase a un padroado formado por Patricio Erhardt, Luz Pardo, Juan Quiroga, Manuel Galdo, Carlos Fernández, e o presidente da entidade, Antonio Couceiro.
A Oficina de Promoción Tecnolóxico-Industrial da Cámara de Comercio da Coruña ten como obxectivo “captar e atraer investimento tecnolóxico e industrial, principalmente no contexto da industria 4.0, cara os polígonos industriais xa implantados e aqueles en vías de desenvolvemento”.
Julio Abalde subliñou a relevancia deste convenio pois “pretendemos que a UDC se implique máis no tecido produtivo da sociedade á que servimos”. O reitor avanzou a dispoñibilidade da universidade para colaborar coa Fundación da Oficina de Promoción Tecnolóxico-Industrial e manifestou a súa disposición para poñerse “a traballar desde o primeiro momento”.
Para Antonio Couceiro, presidente da Cámara de Comercio e da Fundación da Oficina de Promoción Tecnolóxico-Industrial, “contar coa UDC é clave para a consecución do noso principal obxectivo, que non é outro que revitalizar o atractivo da área para a localización de novas iniciativas con potencial innovador e de crecemento e mellorar a competitividade das xa instaladas”.
Ao acto de firma desta mañá asistiron ademais o vicerreitor de Política Científica, Investigación e Transferencia, Salvador Naya, e o director Xeral da Fundación, Manuel Galdo.

PUBLICIDADE