A UDC organiza a sétima edición da First LEGO League Galicia
venres, 14 de maio do 2021
A
Universidade
da Coruña organiza, por sétimo ano consecutivo, a First LEGO League
Galicia (FLL Galicia), o vindeiro sábado 29 de maio, nunha
modalidade integramente en liña por mor da crise sanitaria derivada
da COVID-19, entre as 09:00 e as 15:00 horas. Nesta edición,
participan un total de 35 equipos (19 na categoría FLL Challenge, 13
na FLL Explore e 3 na FLL Discover) e máis de 250 mozos e mozas de
toda Galicia. O evento, coordinado polo profesor José Antonio
Becerra Permuy, poderá seguirse en directo a través da canle
oficial de YouTube da FLL Galicia.
O
Salón de Actos Concepción Arenal do Campus de Ferrol acolleu este
14 de maio a presentación da sétima edición da liga galega, á que
asistiron o alcalde do Concello de Ferrol, Ángel Manto Escalona; a
vicerreitora do Campus de Ferrol e Responsabilidade Social, María
Jesús Movilla Fernández; o director do Campus Industrial, Ginés
Nicolás Costa; o director da Escola Politécnica Superior, Armando
Yáñez Casal; o director da Escola Universitaria Politécnica,
Andrés Piñón Pazos; e o coordinador da FIRST LEGO League Galicia,
José Antonio Becerra Permuy.
Como
cada ano, colaboran nesta iniciativa o Instituto Galego de Promoción
Económica (IGAPE), a Deputación Provincial da Coruña, o Concello
de Ferrol e o Conservatorio Profesional de Música de Ferrol Xan
Viaño. Ademais, patrocinan a FIRST Lego League Galicia a empresa
Gabadi SL, o Colexio Profesional de Enxeñaría en Informática de
Galicia (CPEIG), o Ilustre Colexio Oficial de Enxeñeiros Industriais
de Galicia (ICOIIG), GADIS, R, Error Ferrol!, PuntoGal, Neodyn,
TodoOcio e Lidl.
Segundo
se fixo saber no acto deste venres, a First LEGO League é un
programa internacional que desafía a mozos e mozas, de entre 10 e 16
anos, a resolver problemas do mundo real como poden ser a reciclaxe,
a educación ou as enerxías renovábeis.
Nesta
tempada, a competición celebra os seus 15 anos en España. Ao longo
de todo este tempo teñen participado nos distintos torneos
clasificatorios e a gran final máis de 110.000 mozos e mozas
organizados en 25.000 equipos.
Na
edición 2020/21, a través do Desafío RePlay proponlles aos equipos
que atopen solucións innovadoras para volver definir e revolucionar
o xeito no que facemos deporte, xogamos ou nos movemos, empregando as
ferramentas e a tecnoloxía de hoxe en día.
Os
equipos teñen que resolver este desafío en tres áreas de traballo:
·
O Proxecto Científico. Un proxecto científico que explique e
detalle a súa solución innovadora como opción de mellora ao
problema proposto.
· O
Xogo do Robot. O deseño, construción e a programación dun robot
LEGO Mindstorms Education que terá que superar divertidas misión
nun taboleiro de xogo relacionado co desafío.
· A
integración dos valores First LEGO League. Mentres os equipos
desenvolven o Proxecto Científico e o Xogo do Robot, integran os
valores First LEGO League: descubrimento, innovación, impacto,
inclusión, colaboración e diversión.