A USC e a UVigo impartirán o vindeiro curso un mestrado oficial sobre drons
mércores, 23 de maio do 2018
O Aeródromo de Rozas acolleu hoxe o acto de
presentación do Mestrado
Oficial Interuniversitario en Operacións e Enxeñaría de Sistemas
Aéreos non Tripulados, unha contribución formativa que se
dirixe a fornecer ao sector de profesionais cualificados para o
deseño, fabricación, certificación, operación e mantemento deste
tipo de sistemas e tecnoloxías aéreas (UAV, drons e toda a
tecnoloxía de control, manexo, seguimento e xestión dos datos que
os acompaña). Segundo
se fixo saber, o mestrado será impartido o vindeiro curso polas
universidades de Vigo e Santiago de Compostela, concretamente
pola Escola de Enxeñaría Aeronáutica e do Espazo do Campus de
Ourense e a Escola Politécnica Superior de Enxeñaría do Campus de
Lugo.
O acto contou coa asistencia de Arno Formella,
director da Escola de Enxeñaría Aeronáutica e do Espazo; Higinio
González, coordinador do mestrado por parte da Universidade de Vigo;
Tomás Cuesta, director da Escola Politécnica Superior de Enxeñaría;
Mª Luz Gil, coordinadora do mestrado por parte da Universidade de
Santiago de Compostela; Patricia Argerey, directora da Axencia Galega
de Innovación (GAIN), e Neves Seoane, responsábel do Centro de
Investigación Aeroportada de Rozas.
Segundo explicaron, o Mestrado en Operacións e
Enxeñaría de Sistemas Aéreos non Tripulados é un posgrao oficial
de carácter presencial que está estruturado en 60 créditos ECTS e
que se imparte ao longo dun curso académico. O posgrao, “de
marcada orientación profesional”, arrancará no curso 2018/2019
cun límite de 24 prazas, considerándose o perfil de ingreso
recomendado calquera grao en enxeñaría ou física. A actividade
formativa contará con dúas especialidades, unha de aplicación na
xestión dos recursos da terra, liderada pola Universidade de
Santiago de Compostela, e outra de enxeñaría de sistemas aéreos
non tripulados, liderada pola Universidade de Vigo.
Haberá prácticas obrigatorias de dous meses para
todo o alumnado en empresas, centros de investigación e centros
tecnolóxicos, sendo xa máis de 30 as entidades que apoian a posta
en marcha deste programa oficial de posgrao.
