A UVigo amósanos como converternos en creadoras audiovisuais co noso móbil

A Universidade de Vigo está a subministrar por vez primeira un curso para a creación de contidos audiovisuais para redes sociais empregando unha das ferramentas máis estendidas e (xa) con maiores e mellores posibilidades creativas: o teléfono móbil. O obradoiro, inserido na programación do segundo cuadrimestre, comezou o pasado 19 de febreiro e estenderase ata o vindeiro 14 de maio, os martes, en sesións de tres horas. Trátase dunha actividade práctica que busca axudar ao alumnado a tirar proveito do móbil “como unha ferramenta de traballo máis”.
Á fronte deste obradoiro atópase Xoan Mariño, produtor executivo e cultural en Mr. Misto, que, alén dos recursos tecnolóxicos sobre os que pon o foco, artella un contido formativo que salienta por enriba de todo a importancia do guión: “Cómpre que o alumnado teña claro que quere contar, como o quere contar e a quen está a obra destinada”. Polo que se refire aos aspectos de creación audiovisual que se imparten, teñen como dixemos unha natureza práctica. Por exemplo, incluíuse a elaboración a pé de rúa dunha entrevista con móbil, unha actividade que lles serviu aos asistentes para crear e aprender a manexarse coas ferramentas”. O obxectivo do obradoiro é dar ao alumnado unha base firme para que poida seguir dedicándose ao proxecto que teñen elixido unha vez que remate o curso.