A UVigo e Ineo convidan cun curso a reflexionar na hipertecnoloxización
luns, 25 de setembro do 2017
Entre
as actividades formativas que vén de presentar a Universidade de
Vigo para a recta final do ano académico figura
unha iniciativa directamente encamiñada a avaliar determinadas
cuestións de poder e de influencia relacionada coas novas
tecnoloxías. Cuestións como por exemplo a seguinte: que pasa,
tendo en conta o importante potencial das redes como canles de
información activa, cando unha persoa ou un colectivo que é
perigoso para a sociedade localiza a clave para sacarlle o máximo
rendemento a ese potencial? Dar reposta a estas e outras preguntas, e
impulsar o debate e a reflexión arredor dos ricos dun mal uso das
TIC é un dos obxectivos do curso
Ethics and Technology, coordinado por Íñigo Cuíñas,
director da Escola de Enxeñaría de Telecomunicacións (EET), e por
Lucía Gregorio, directora xeral da asociación galega de empresas
tecnolóxico-dixitais Ineo.
A proxección en versión orixinal
da serie británica Black Mirror será o punto de partida dos
debates. Segundo Cuíñas, elixiuse esta serie porque se serve de
futuro, de posíbeis situacións futuras, para facernos pensar sobre
o presente. O futuro, nos capítulos de Black Mirror, é “un
mundo distópico no que o uso compulsivo das tecnoloxías provocou
que o colectivo destruíse á persoa individual mediante numerosas
intrusións na intimidade que se admitiron como normais ou
necesarias”, sinala o coordinador da actividade formativa,
engadindo que coa presentación destas situacións búscase que as e
os asistentes “reflexionen sobre como están a mudar a nosa
sociedade e o noso modo de vida e sobre as consecuencias que estes
cambios poden ter para o futuro”.
A
iniciativa, explica Cuíñas e Gregorio, non consiste na creación
dun foro sobre tecnoloxía, polo que as persoas interesadas non teñen
que estar formadas nese ámbito, senón que “ deberán ter
capacidade crítica e estar sensibilizadas coa sociedade e o
individuo, xa que o obxectivo do curso é recapacitar sobre o futuro
que vemos e o futuro cara o que queremos”, apunta Íñigo Cuiñas.
Polo tanto, poderá matricularse no curso tanto o alumnado da Escola
de Enxeñaría de Telecomunicación (EET) e as persoas traballadoras
de empresas asociadas a Ineo, como o público en xeral. Os únicos
requisitos académicos esixidos son o título de bacharelato e un
alto nivel de inglés falado.
As
sesións do curso terán lugar todos os venres lectivos entre o 27 de
outubro e o 15 de decembro entre as 15.30 h e as 18.00 h. A
matrícula, dispoñible en liña a partir do día 1 de outubro tras
ter formalizada a preinscrición, ten un custo de 50 euros coa
posibilidade de obtención dunha bolsa que cubra estes gastos. As 20
prazas dispoñibles adxudicaranse por orde de inscrición; delas
garántese que, 8 estarán destinadas ao alumnado, outras 8, aos
asociados á Ineo e as 4 restantes quedarán á disposición do
público.