A Universidade de Vigo e Gradiant colaborarán en achados concretos de ciberseguridade
luns, 19 de marzo do 2018
A Universidade de Vigo quere ir máis alá de
tender pontes entre o tecido investigador dos campus e o tecido
industrial galego: quere impulsar ao máximo a circulación por esas
ponte. Circulación de que tipo? Pois basicamente de coñecemento
avanzado e tecnoloxías prontas para ser aplicadas no mercado con
vistas a crear produtos e servizos concretos que sexan rendíbeis e
que melloren a nosa vida diaria. Estes
son algúns dos obxectivos básicos de Cyprian, CYbersecurity,
PRIvacy and Anonymity Lab, un laboratorio posto en marcha
entre a Universidade de Vigo e o Centro Tecnolóxico de
Telecomunicacións de Galicia (Gradiant) e que foi presentado
hoxe nos seus detalles polos principais responsábeis.
Participaron Salustiano Mato, reitor da UVigo,
Domingo Docampo, ex-reitor e docente da Escola de Telecomunicación,
Luis Pérez Freire, director xeral de Gradiant, o director do centro
AtlantTIC, o profesor Carlos Mosquera, e a comisionada do reitor para
o Vigo Tecnolóxico, Edita de Lorenzo
Segundo fixeron saber, Cyprian non terá sede
propia de seu, pero si cometidos firmes e claros: por exemplo,
realizar actividades que fomenten a transferencia, desenvolver
proxectos de investigación e teses de doutoramento, facilitar
asesoramentos, fomentar as sinerxías entre tecido industrial e
outras partes interesadas, permitir estadías cruzadas de persoal e
achegar a posibilidade de compartir equipamentos, entre outras
cuestións.
Segundo apuntou o reitor, Cyprian “é un
paraugas que abriga todo o que estamos facendo e todo o que imos
facer no futuro”, explicou, ao tempo que fixo fincapé en que a
sinatura do convenio chega nun momento “de clara madurez” para
Gradiant, “cando xa é unha peza importante do ecosistema de
innovación galego” e a idea é dotar a relación entre ambas
institucións “dunha perspectiva a medio e longo prazo”.
Na formalización do acordo, os responsábeis de
ámbalas entidades engadiron que a ciberseguridade e o procesado
seguro da información será un dos grandes eidos de actividade
conxunta, un ámbito no que a Universidade e Gradiant xa viñan
traballando xuntos, pero ao que se lle vai dar novos azos ao abeiro
de Cyprian. “Cando falamos de ciberseguridade estamos a falar agora
mesmo de algo que xa leva aí moito tempo, xa que desde que as TIC
son TIC sempre preocuparon estes temas e isto foi a máis nos últimos
anos coa dixitalización, a irrupción da industria 4.0, a internet
das cousas... Trátase de ser capaces de procesar e competir a
información dun xeito seguro”, explicou o director xeral de
Gradiant.
Ciberseguridade, punto forte do Vigo
Tecnolóxico
“Os contidos da investigación e da innovación
que se fan en Gradiant están aliñados coa estratexia da
Universidade de Vigo e, máis concretamente, do noso campus de
especialización, o Vigo Tecnolóxico”, explicou o reitor vigués,
engadindo que “a través de Gradiant conseguimos que o coñecemento
que se xera nos nosos laboratorios chegue á realidade social, non só
ao tecido empresarial, senón tamén ao día a día das persoas e
esta é a forma que entendemos, a través da transferencia de
coñecemento, de facer músculo na sociedade na que vivimos e ser un
auténtico axente de desenvolvemento económico”. Mato tamén
lembrou que a Universidade conta xa cunha Cátedra Deloitte de
Ciberseguridade, ten como centro adscrito o Centro Universitario da
Defensa e que o vindeiro curso comezará tamén a impartirse na
Universidade de Vigo un máster especializado en ciberseguridade.
p margin-bottom: 0.25cm; line-height: 120%; a:link