A VI edición do Concurso de microrrelatos da RAG e PuntoGal xa ten palmarés

Máis dun milleiro de persoas de todas as idades con textos de até 200 palabras quixeron probar sorte na sexta edición do Concurso de microrrelatos da Real Academia Galega (RAG) e PuntoGal. Xa se deron a coñecer os e as premiadas deste certame. Nel Vidal (Artes, Ribeira, 1980) acadou o primeiro premio na categoría de adultos, á que se presentaron arredor de 450 relatos, con Deberes de lingua, un texto de 67 palabras para reflexionar sobre o que significa compartir a vida. O autor foi técnico de normalización lingüística do Concello de Carballo durante quince anos, presidente da Coordinadora de Traballadores/as de Normalización da Lingua (CTNL) e director do Culturgal, na actualidade adícase á docencia de Lingua Galega e Literatura.
O segundo premio de persoas adultas é para Nanda Costas Misa (Vigo, 1978), por A foto. Nanda, costureira e contacontos, veciña de Nigrán, escribe unha emotiva historia de 196 palabras que viaxa a tempos pasados nos que a fotografía foi máis ca nunca unha maneira de inmortalizar os seres queridos.
O terceiro premio na categoría de adultos foi para Mónica Fraga Rodríguez (A Laracha, 1974), na actualidade veciña de Oleiros, co relato titulado Zen, que consegue arrincar o sorriso con só 46 palabras. Licenciada en Física, é profesora de Tecnoloxía do mencionado IES Rego de Trabe, do que é a directora.
Na modalidade xuvenil, á que concorreron case 400 mozos e mozas entre os 12 e os 17 anos, o xurado premiou as historias de tres mozas de Ames, Vigo e Teo. Andrea Bravo López (Ames, 2009), estudante do IES do Milladoiro, acadou a máxima distinción con Querer, o relato, con só 9 palabras, máis breve dos nove galardoados. O segundo premio é para Mencía Jorge Cabaleiro (Vigo, 2006), alumna do IES Castelao da súa cidade natal, por Perda, un texto de 191 palabras sobre o que vai ficando atrás a vida e a ferida que deixa; e o terceiro para Beatriz Martínez García (Teo, 2006), alumna do IES de Cacheiras, por Cun pouco de azucre, un relato que transmite unha chea de emocións desacougantes en só 85 palabras.
A categoría infantil contou coa participación de preto de 200 nenos e nenas de ata 11 anos. Ainhoa Valverde Silva (Baiona, 2012), alumna CPI de Cova Terreña, foi recoñecida co primeiro premio por O meu irmán, de 93 palabras; Arwen Fernández García (Nigrán, 2014), alumna do CEIP Humberto Juanes, recibiu o segundo por O poema, o segundo relato máis curto de todos os distinguidos, de só 11 palabras; e Mai Lemmen (Geldrop, Holanda, 2016), alumna do CEIP Castrelo de Miño, foi recoñecida co terceiro por A gatiña saltarica, de 40 palabras.
Os relatos presentados na modalidade de persoas adultas foron valorados polo xurado composto polo presidente da RAG, Víctor F. Freixanes; o presidente de PuntoGal e tamén académico de número, Manuel González González; a académica de número María Dolores Sánchez Palomino; o director xeral de PuntoGal, Darío Janeiro; e a xornalista Rosalía Macías Tarrío. O xurado das modalidades infantil e xuvenil integrárono o académico de número Gonzalo Navaza, a académica correspondente Celia Pereira Porto, a profesora da Universidade de Vigo e secretaria da xunta directiva de PuntoGal, Edita de Lorenzo, e o mestre e escritor Lois Pérez.
As persoas gañadoras recibirán distintos premios tecnolóxicos (computadores, consolas, lectores electrónicos de libros) e relacionados coa lectura nun acto público que se celebrará proximamente. Nun futuro próximo poderán lerse os relatos gañadores nunha edición dixital.