A XXII Noite Galega das Telecomunicacións xirará arredor da ciberseguridade
martes, 4 de xullo do 2017
O Colexio Oficial e a Asociación de Enxeñeiros
de Telecomunicación de Galicia (COETG-AETG) teñen estes días unha
serie de novidades entre mans. Por unha banda, a asociación está a
festexar este ano o seu 25 aniversario e o colexio o seu medio século
de vida,
con todo o que de especial significado ten esta celebración (décadas
e máis décadas de intenso traballo a prol do desenvolvemento das
comunicacións avanzadas na nosa terra). Pola outra, está a preparar
os detalles da que será unha das grandes xuntanzas da tempada, xa
non só do ámbito TIC, senón de todo o conxunto de “ámbitos”
da nosa terra: a Noite
Galega das Telecomunicacións e da Sociedade da Información.
Segundo nos recorda o novo director da AETG, Julio Sánchez Agrelo, a
nova edición da gala xirará arredor da ciberseguridade. Ademais,
como de costume, virá acompañada da entrega dos Premios Galicia das
Telecomunicacións, cos que se recoñecen os proxectos e as persoas
que traballan neles, pola súa contribución á sociedade a traveso
das TIC.
A Noite Galega deste ano celebrarase o día 29 de
setembro contando coa ciberseguridade como fío temático principal.
Segundo nos contou recentemente o director da AETG, “escolleuse
esta temática para analizar os diferentes factores que inflúen no
afianzamento da utilización do espazo dixital de forma segura”.
Estarán presentes neste foro todos os axentes implicados en
ciberseguridade, tanto do ámbito privado como do público, para
tomar consciencia da importancia do ciberespazo e a seguridade do
mesmo no desenvolvemento económico e social.
Polo
que respecta aos Premios Galicia das Telecomunicacións,
divídense en tres categorías:
A primeira é Premio Gerardo García
Campos á mellor iniciativa empresarial no sector 2017, convocado
pola Asociación de Enxeñeiros de Telecomunicación de Galicia e
patrocinado pola Fundación Gerardo García Campos e dotado con 6.000
euros. Trátase dunha iniciativa que premia aqueles proxectos
empresariais emerxentes no ámbito das Tecnoloxías da Información e
da Comunicación (TIC) que representen unha innovación, coa
finalidade de darlles un impulso económico, empresarial e social a
aquelas empresas que están empezando a súa andaina.
A segunda modalidade, convocada pola
Asociación de Enxeñeiros de Telecomunicación de Galicia, é o
Premio Gradiant á mellor tese doutoral aplicada ao sector TIC 2017.
Coa concesión desta distinción patrocinada pola Fundación Centro
Tecnolóxico das Telecomunicacións de Galicia (Gradiant) e dotada
con 1.500 euros, preténdese fomentar a realización de teses
doutorais con potencial de aportar valor no mercado como vehículo de
xeración de coñecemento e recoñecer a aqueles investigadores das
universidades galegas que teñan completada a súa tese doutoral nun
eido aplicable ao sector TIC.
Polo que respecta á terceira
categoría, convocada tamén pola Asociación de Enxeñeiros de
Telecomunicación de Galicia, trátase do Premio ao Mellor Proxecto
TIC con Beneficios Sociais 2017, achegado en colaboración coa
Axencia para a Modernización Tecnolóxica de Galicia (AMTEGA) da
Xunta de Galicia. Este galardón de carácter honorífico, pretende
recoñecer os mellores proxectos no ámbito das Tecnoloxías da
Información e a Comunicación que contribúan e aporten beneficios á
sociedade.
Segundo lembra o COETG-AETG, toda a
información sobre as convocatorias dos premios está dispoñíbel na
web corporativa www.aetg.gal.