A Xbox One permitirá que os seus usuarios intercambien mensaxes de voz

Atendendo ás demandas dos usuarios Microsoft preparou numerosas novidades no software da Xbox One para facilitar que a comunidade de usuarios poida relacionarse mellor, e durante a fin de semana vai espallar entre usuarios de proba novas prestacións que se probarán durante o mes de abril entre as que destaca especialmente a posibilidade de deixar mensaxes de voz a outros usuarios. Deste xeito, os usuarios do programa preliminar de Xbox One poderán xa gravar mensaxes de voz que poderán recibir os seus amigos, e que pretenden funcionar tanto en Xbox One coma en Xbox 360.
Outro cambio interesante para as conversas en grupo é que contarán con servidores dedicados, o que permitirá uns chats máis estables entre os usuarios que teñen habitualmente problemas de NAT ao estar conectados a través de conexións á Rede que non están debidamente optimizadas para certas comunicacións a través da Internet.
Como última novidade continúan as melloras á sección do menú da consola na que se destaca o que está de actualidade, para poder descubrir detalles sobre xogos, películas, programas de televisión, transmisións de partidas e vídeos, aínda que polo momento só está dispoñible en EE.UU.

Vídeo no que detallan os cambios que están a preparar para a Xbox One